Cefnogwyr am weld Cymru'n 'mynd mas ar nodyn uchel'

Ben Davies: 'Rhaid taflu popeth at y gêm' yn erbyn Lloegr

Gan Iolo Cheung
Gohebydd Cymru Fyw yn Qatar

Mae'r mathemateg yn dweud ei bod hi'n bosib o hyd - ond siaradwch ag unrhyw gefnogwr Cymru sydd dal yn Doha, a phrin yw'r gobaith.

I gyrraedd rownd nesaf Cwpan y Byd bydd yn rhaid i'r crysau cochion drechu Lloegr heno, a gobeithio am gêm gyfartal rhwng yr UDA ac Iran.

Yr unig lwybr arall i rownd yr 16 olaf yw trechu'r Saeson o bedair gôl neu fwy, rhywbeth dydyn nhw erioed wedi ei wneud mewn 103 o gemau yn erbyn ei gilydd.

Os mai dyma fydd ffarwel Cymru â Qatar felly, mae dyhead y Wal Goch yn un clir - fod y tîm o leia'n gadael un marc olaf ar y gystadleuaeth cyn dychwelyd adref.

Dywed John Williams mai'r prif emosiwn yw "balchder" fod Cymru yma

"Hyd yn oed os maen nhw'n colli fi just isie gweld nhw'n chwarae'n dda, achos yn y ddwy gynta' ni heb ddangos pa mor dda ni'n gallu bod," meddai John Williams o Bontypridd.

"O leia' wedyn bydd y cefnogwyr yn gallu mynd gartref yn hapus.

"Ond fi'n stryglan i weld lle mae'n goliau ni'n mynd i ddod ar hyn o bryd."

Beth sydd ei angen ar Gymru?

I gyrraedd y rownd nesaf, mae angen i Gymru guro Lloegr ddydd Mawrth.

Petai Iran a'r UDA yn cael gêm gyfartal, yna byddai unrhyw fuddugoliaeth yn ddigon i Gymru.

Ond os nad yw'r gêm yna'n gyfartal, byddai angen i Gymru ennill o bedair gôl - i sicrhau gwahaniaeth goliau gwell na Lloegr.

Mae'n dweud mai'r prif emosiwn yw "balchder" fod Cymru yma, yn hytrach na siom am y canlyniadau.

Ond mae'n ysu i weld y tîm yn cael canlyniad heno - yn enwedig i chwaraewyr hŷn y garfan.

"Fi'n teimlo dros rhai fel [Gareth] Bale a [Wayne] Hennessey - falle mai hwn fydd Cwpan y Byd ola' nhw," meddai.

"Felly ni isie iddyn nhw fynd mas ar nodyn uchel hefyd, achos fi'n meddwl bod sawl un yn y garfan yna fydd ddim yn chwarae dros Gymru eto."

Ben Cole: 'Ni just isie i'r chwaraewyr ddangos ar y cae bod nhw'n haeddu bod yma'

Wrth grwydro'r Souq Waqif ddydd Llun gyda'i ffrindiau, roedd Ben Cole o Borthcawl yn ysu i weld Cymru'n gwneud y gorau o'r cyfle olaf o bosib i greu argraff ar weddill y byd.

"Fi just isie gweld bach o ffeit yn y tîm, cadw'r bêl bach yn well, a just dangos be' maen nhw wedi 'neud lan at nawr i gyrraedd 'ma," meddai.

"Ni 'ma er mwyn i'r byd weld ni. Fel cefnogwyr ni 'di 'neud 'na, cymysgu gyda phawb arall, a ni just isie i'r chwaraewyr ddangos ar y cae hefyd bod nhw'n haeddu bod yma."

Mae'n cyfaddef y bydd hi'n "anodd i ni fynd drwyddo nawr", o ystyried bydd rhaid curo un o ffefrynnau'r gystadleuaeth i gael unrhyw obaith.

Ond bydd y rhan fwyaf o gefnogwyr y gwledydd eraill y tu ôl i'r Wal Goch heno, meddai.

"Wrth siarad gyda ffans y gwledydd eraill maen nhw i gyd yn dweud 'chi am guro Lloegr', ma' fe'n edrych fel bod pawb arall isie i ni 'neud e hefyd," meddai.

"Ma' fe wastad yn neis curo Lloegr, ond mae e mwy am weld ni'n rhoi perfformiad da i mewn, a gweld beth sy'n digwydd.

"Os yw e'n mynd â ni drwyddo, grêt, os ddim, ddown ni 'nôl tro nesa'."

Bydd Victor o Frasil yn cefnogi Cymru yn hytrach na Lloegr nos Fawrth

Doedd barn y cefnogwyr o wledydd eraill yn Doha ddim yn unfrydol, yn sicr, a sawl un yn dweud wrtha i mewn sgyrsiau yn ystod y dydd mai Lloegr fydden nhw'n tueddu tuag ato.

Ond roedd y mwyafrif yn sicr yn bleidiol i Gymru, a hynny cyn i mi ddatgelu mai o dyna le o'n i'n dod.

Doedd neb yn fwy pendant na Victor o Sao Paulo, oedd yn cadw sŵn gyda chefnogwyr eraill Brasil ar y metro draw i'w gêm yn erbyn y Swistir.

"Wales, Golf, Madrid," oedd ei gri wrth ymateb i'r cwestiwn am bwy fyddai'n cefnogi - cyfeiriad i bennawd enwog am Bale - cyn dechrau canu am ddiffygion amddiffynnol Harry Maguire o Loegr.

Mae'r ymwybyddiaeth gynyddol yna o Gymru ar y map pêl-droed wedi bod yn thema amlwg o'u hymddangosiad yng Nghwpan y Byd.

Getty Images

Gareth Bale, Ben Davies a Chris Gunter yn ymarfer olaf Cymru cyn wynebu Lloegr

Ac i Matthew Womersley, Cymro o Fangor sydd bellach yn byw yn Taiwan, y gobaith yw y bydd hynny'n treiddio ymhellach, waeth beth fydd y canlyniad nos Fawrth.

"Maen nhw i gyd yn meddwl bod Cymru a Lloegr yr un peth, so ella fydda nhw'n gwybod bod Cymru'n wlad rŵan - gobeithio fyddan nhw ar ôl y gêm yma anyway," meddai.

"Dwi'n goro deutha nhw 'ydy China yr un peth â Taiwan?' ac maen nhw'n deud nadi, a dwi'n d'eud bod Cymru a Lloegr fel 'na hefyd, ac maen nhw'n dallt."

Matt Womersley (chwith) efo'i ffrind Martyn Kay

Efallai bod rhai o'r Cymry yn Doha wedi pacio'u bagiau yn barod, ond mae Matthew yn credu bod un sioc arall i ddod.

"Dwi'n meddwl 'nawn ni gael result yn erbyn Lloegr - ma' nhw just am ddeud stwffia fo, mynd amdana fo," meddai. "Fyddan nhw isio profi pwynt."

Dilynwch y gêm ar ein llif byw arbennig fydd yn dechrau am 17:00.

Pynciau cysylltiedig

Straeon perthnasol