Partïon Rhif 10: Drakeford yn cyhuddo Sunak o lwfrdra am golli pleidlais

Dywedodd Rishi Sunak nad oedd am "ddylanwadu ar unrhyw un" cyn pleidlais Partygate

Cyflawnodd Rishi Sunak "weithred syfrdanol o lwfrdra gwleidyddol" trwy gadw draw o'r bleidlais ar bartïon Rhif 10 ddydd Llun, meddai'r Prif Weinidog Mark Drakeford.

Yn Senedd Cymru dywedodd Mr Drakeford ei fod yn enghraifft o "wendid gwleidyddol" Mr Sunak.

Fe wnaeth ASau yn San Steffan, yn absenoldeb y prif weinidog, gefnogi adroddiad nos Lun a ganfu fod Boris Johnson wedi camarwain Senedd y DU yn fwriadol am gyfnodau clo yn Rhif 10.

Dywedodd y pwyllgor y byddai wedi argymell atal Johnson o'r Tŷ am 90 diwrnod petai dal yn AS.

'Parchu' y canlyniad

Mae llefarydd Mr Sunak wedi dweud ei fod yn "parchu" y canlyniad.

Roedd Mr Sunak ymhlith y 225 o ASau Ceidwadol na chymerodd ran yn y bleidlais.

Pleidleisiodd saith yn erbyn, tra pleidleisiodd 118 o blaid.

Derbyniwyd yr adroddiad gan bum Ceidwadwr Cymreig - gan gynnwys Ysgrifennydd Cymru David Davies, dau o'i ragflaenwyr Simon Hart a Stephen Crabb, ynghyd â Fay Jones a Craig Williams.

Ni phleidleisiodd yr wyth Ceidwadwr arall - gan gynnwys cyn-ysgrifenyddion Cymru David Jones ac Alun Cairns.

Ar ei thudalen Facebook dywedodd Fay Jones, AS Brycheiniog a Sir Faesyfed, y byddai "wedi bod yn anodd i mi edrych ar fy etholwyr yn eu llygaid" pe bai wedi ymatal.

• Guto Harri: 'Johnson wedi ei dwyllo gan y broses'

• Camarwain Senedd: 'Cyfiawnder' wedi 'celwydd' Johnson

Roedd adroddiad y pwyllgor trawsbleidiol wedi canfod bod Mr Johnson wedi torri rheolau droeon pan ddywedodd fod rheolau Covid wedi'u dilyn yn Rhif 10 bob amser.

Yn ei ymddangosiad cyntaf yn y Senedd fel arweinydd Plaid Cymru yng Nghwestiynau i'r Prif Weinidog, dywedodd Rhun ap Iorwerth fod y Ceidwadwyr Cymreig na phleidleisiodd "yn ochri â Boris Johnson".

Fe wnaeth Mark Drakeford gyhuddo Rishi Sunak o "wendid gwleidyddol"

Atebodd Mr Drakeford: "Roedd yn weithred syfrdanol o lwfrdra gwleidyddol bod prif weinidog y wlad hon wedi methu â chefnogi adroddiad gan bwyllgor annibynnol yn Nhŷ'r Cyffredin oedd yn gyfrifol am yr ymchwiliad hwnnw."

"Mae'r ffaith i'r prif weinidog fethu â chefnogi'r pwyllgor hwnnw yn enghraifft syfrdanol o'i wendid gwleidyddol."

Dywedwyd wrth y BBC fod gan y prif weinidog "ymrwymiadau hirsefydlog" ddydd Llun.

• Pethau wedi mynd 'yn drasig o'i le' i Boris Johnson

Gofynnodd gohebwyr dro ar ôl tro i Mr Sunak ddydd Llun sut y byddai'n pleidleisio ond ni atebodd y cwestiwn yn uniongyrchol.

Dywedodd fod y mater yn "fater i Dŷ'r Cyffredin, nid i'r llywodraeth".

"Mae hwnna'n wahaniaeth pwysig a dyna pam fyddwn i ddim eisiau dylanwadu ar neb cyn y bleidlais."