Urdd: Agor gwersyll newydd ym Mhentre Ifan, Sir Benfro

Mae'r cynlluniau ar gyfer Gwersyll Pentre Ifan bellach wedi eu gwireddu a'r safle wedi agor yn swyddogol ddydd Iau

Mae pedwerydd Gwersyll yr Urdd wedi agor yn swyddogol ym Mhentre Ifan yn Sir Benfro.

Nod y gwersyll newydd yw blaenoriaethu'r amgylchedd, lles emosiynol pobl ifanc a'r Gymraeg.

Yn ôl y mudiad, Gwersyll Amgylchedd a Lles, Pentre Ifan yw'r cyntaf o'i fath yng Nghymru, gyda'r profiad yn addo i fod yn "ddihangfa rhag y byd digidol" i wersyllwyr.

Agorwyd Pentre Ifan ym 1992 a hynny fel canolfan addysgol.

• Agor 'calon' newydd gwersyll yr Urdd yn Llangrannog

• Yr Urdd yn dathlu agor canolfan newydd

Prif bwyslais y ganolfan ger Felindre Farchog, Crymych oedd cynnig addysg amgylcheddol i blant a phobl ifanc.

Erbyn hyn, trwy gymorth rhaglen Cymunedau Dysgu Cynaliadwy Llywodraeth Cymru, Sefydliad Garfield Weston a Sefydliad Elusennol Tywysog Cymru, mae Canolfan Pentre Ifan wedi trawsnewid i fod yn wersyll.

Rhai o ddisgyblion Ysgol Bro Preseli yn yr agoriad swyddogol gyda Gweinidog y Gymraeg ac Addysg, Jeremy Miles

'Lles, amgylchedd a dyfodol cynaliadwy'

"Pwrpas Pentre Ifan yw i rymuso pobl ifanc i weithio gyda'i gilydd," meddai Siân Lewis, Prif Weithredwr yr Urdd.

"I flaenoriaethu lles, i ddysgu gofalu am yr amgylchedd a chyfrannu tuag at ddyfodol mwy cynaliadwy…

Mae'r ganolfan yn "arloesol" yn ôl Prif Weithredwr yr Urdd, Sian Lewis

"Mi fydd Gwersyll Pentre Ifan yn ein galluogi i barhau i gael effaith gadarnhaol ar iechyd emosiynol a iechyd meddwl cenedlaethau'r dyfodol."

Gyda'r Urdd yn cynnal cynadleddau ieuenctid yn flynyddol ar draws eu gwersylloedd, daeth y syniad ar gyfer y datblygiad gan eu pobl ifanc ar gyfer eu pobl ifanc, yn ôl y mudiad.

"Beth oedd yn eu poeni nhw fwya' yn y cyfnod oedd yr amgylchedd, lles a iechyd meddwl pobl ifanc" meddai'r Prif Weithredwr.

"Wrth bo' ni'n edrych ar gyfnod o fuddsoddi sylweddol yn y gwersylloedd, ro'dd hwn yn gyfle rhy dda i golli, sef sefydlu rhywbeth reit arloesol.

Bydd lle i dros 75 o bobl fesul noson yn yr haf gyda yurts yn cael eu defnyddio fel rhan o'r profiad gwersylla

"Does 'na ddim un canolfan breswyl tebyg o'i fath yng Nghymru, felly mae'n braf bod yr Urdd yn gallu mentro ac yn gallu cynnig y ddarpariaeth yn ôl gofyn ein pobl ifanc ni."

• Yr Urdd am greu gwersyll amgylcheddol

Mae Pentref Ifan ar ei newydd wedd yn cynnwys neuadd sydd wedi'i hadnewyddu a llety o safon ym mhedwar o'r adeiladau oedd ar y safle.

Bydd lle i 40 person gysgu fesul noson yn y gwersyll dros y gaeaf, a lle i dros 75 yng nghyfnodau'r haf, gyda yurts yn cael eu defnyddio fel rhan o'r profiad gwersylla.

Ynghyd â llety en-suite a glampio, mae ardaloedd arlwyo ac ymolchi sy'n defnyddio pŵer solar, ardd perlysiau, cegin awyr agored a llecynnau lles hefyd ar gael yn y gwersyll.

Fe fydd gweithdai ffasiwn cynaliadwy, ioga a serydda ymysg rhai o'r gweithgareddau eraill fydd yn cael eu cynnig ynghyd â chyfle arbennig i adrodd chwedlau wrth y tân fin nos.

'Dihangfa o'r byd digidol'

"'Dan ni gyd yn ymwybodol gymaint mae'r cyfryngau cymdeithasol yn effeithio ar les a iechyd meddwl pobl ifanc," meddai Sian Lewis, Prif Weithredwr yr Urdd.

"Pan ddewn nhw i Bentre Ifan, fe fyddan nhw'n mynd ar deithiau cerdded ar hyd yr arfordir, y mynyddoedd a'r coedwigoedd, i ddysgu ychydig yn fwy am natur a bywyd gwyllt.

"Bydd sesiynau gwylltgrefft, meddylgarwch, syllu ar y sêr, tyfu a chynaeafu bwyd. Yn sicr, fe fydd e'n dipyn bach o digital detox i bobl ifanc Cymru."

Ynghyd a'r gwaith o adeiladu'r gwersyll newydd, mae'r Urdd wedi buddsoddi'n ehangach i uwchraddio gwersylloedd eraill

Mae datblygu Gwersyll Pentre Ifan yn rhan o waith buddsoddi ehangach gwerth £10m dros y tair mlynedd diwethaf er mwyn uwchraddio cyfleusterau gwersylloedd yr Urdd.

Mae elfennau o Wersyll yr Urdd Llangrannog a Glan-llyn wedi cael eu moderneiddio a'u datblygu hefyd.

Lle i 8,000 o bobl ifanc y flwyddyn

Gwnaeth rhai o ddisgyblion Ysgol Bro Preseli gymryd rhan yn y seremoni agoriadol ar gyfer y ganolfan newydd.

Dywedodd Emily o Flwyddyn 13: "Dwi n hoff iawn o'r ffaith ei fod e yng nghanol natur ac yn dawel a heddychlon iawn.

"Mae'n bwysig iawn i bobl ifanc, mae llawer o bobl ar ffonau symudol a ddim yn canolbwyntio ar natur.

"Mae'n apelgar iawn. Mae natur yn bwysig imi felly os ma' pobl yn gallu gweld y natur mae'n dda."

Mae Emily a Lefi, disgyblion yn Ysgol Bro Preseli, yn gwerthfawrogi'r adnoddau newydd ym Mhentre Ifan

Dywedodd Lefi sydd ym Mlwyddyn 12: "Dwi'n meddwl mae'n syniad da iawn ar gyfer Cymru fodern.

"Mae'n gyfle da i ddianc."

Ychwanegodd: "Fi'n siŵr bydd well 'da rhai aros tu fewn ond i ran fwyaf bydd e'n gyfle i fyw bywyd allan o'r sgrin.

"Dwi 'di bod i bob un gwersyll ond ma' Pentre Ifan yn haeddu'i le fel un o'r rhai gorau."

Dywedodd Gweinidog y Gymraeg ac Addysg, Jeremy Miles - yma gyda'r Gweinidog Newid Hinsawdd, Julie James, y bydd Pentre Ifan "yn helpu dysgwyr i barchu a chysylltu â natur a chefnogi eu hiechyd meddyliol"

Dywedodd Gweinidog y Gymraeg ac Addysg, Jeremy Miles AS: "Mae'r Urdd wedi gwneud gwaith gwych yn gwrando ac yn creu canolfan sy'n canolbwyntio ar yr amgylchedd, lles pobl ifanc a'r Gymraeg.

"Mae ein Cwricwlwm i Gymru yn ymwneud â gwrando ar ddisgyblion a dysgu mewn ffordd sy'n ennyn eu diddordeb. Mae'r argyfwng hinsawdd a natur, yn ogystal â lles, yn ganolog i'r Cwricwlwm ac yn rhan o addysg pob dysgwr.

"Rwy'n falch iawn y bydd Pentre Ifan yn helpu dysgwyr i barchu a chysylltu â natur, cefnogi eu hiechyd meddyliol a chorfforol a datblygu perthnasoedd iach â thechnoleg."

Fe fydd datblygiad Gwersyll Pentre Ifan yn cynnig lle i 8,000 o bobl ifanc y flwyddyn, a fydd yn sicrhau bod y mudiad yn denu tua 60,000 o bobl ifanc yng Nghymru i'w gwersylloedd yn flynyddol.