Beirniadu heddlu wedi ymosodiad cŵn yng Nghaernarfon

Dau ddaeargi Patterdale fel yr un yma wnaeth ymosod ar Stephen Phillips yng Nghaernarfon

Mae'r stori hon yn cynnwys delwedd all beri gofid.

Mae dyn o Gaernarfon a ddioddefodd anafiadau difrifol i'w goesau ar ôl ymosodiad gan ddau gi wedi beirniadu Heddlu'r Gogledd am yr amser a gymeron nhw i ymateb i'r achos.

Yn ôl Stephen Phillips roedd yna oedi o "bum wythnos" cyn i swyddogion fynd â'r cŵn o ofal eu perchnogion.

Mae Mr Phillips yn dweud y gall oedi o'r fath beryglu'r cyhoedd.

Dywed Heddlu'r Gogledd mai dilyn y dulliau cywir a achosodd yr oedi cyn symud y cŵn.

'Saethu allan o'r tŷ'

"Wnaeth y cŵn saethu allan o'r tŷ heb unrhyw rybudd a mynd syth amdana i," meddai wrth Cymru Fyw.

"Cawson nhw fi i lawr ar fy mhengliniau, ond wrth lwc o'n i'n gallu codi ar fy nhraed neu buasen nhw wedi mynd am fy ngwddf.

"Ond y peth gwaetha' oedd pan nes i reportio'r digwyddiad i'r heddlu - gymrodd hi bum wythnos cyn mynd â'r cŵn o'r tŷ.

"Pan 'nes i ffonio nhw i holi pam bod o wedi cymryd mor hir iddyn nhw symud y cŵn o'r tŷ ddaru nhw ddweud bod nhw'n gorfod aros i gael dog handler i fynd yna i nôl y cŵn.

"Dylen nhw wedi mynd a'r cŵn o'na yn syth. Fysa hwnna wedi gallu bod yn blentyn neu hen berson a gallwn ni wedi bod yn siarad am rywun yn cael ei ladd."

Dywed Stephen Phillips y bu'n rhaid iddo dderbyn triniaeth am yr anafiadau i'w goesau am gyfnod o ddeufis

Wrth ymateb i sylwadau Mr Phillips fe ddywedodd llefarydd ar ran Heddlu Gogledd Cymru: "Rydym yn deall y pryderon all ddeillio o anaf gan gi ac rydym yn cymryd ymchwiliadau fel hyn o ddifrif.

"Yn y sefyllfa yma, roedd yn rhaid i swyddogion yr heddlu sicrhau bod y dulliau cywir yn cael eu dilyn gan gynnwys gwneud cais am warant llys i gymryd y cŵn, trefnu cytiau priodol i'w lletya a sicrhau y gallai swyddog heddlu, wedi'i hyfforddi'n arbennig, fynychu'r cyfeiriad dan sylw.

"Mae'n angenrheidiol bod y dulliau yma yn cael eu dilyn cyn y gellir mynd ag anifail yn dilyn digwyddiad.

"Ein nod yw rhoi'r wybodaeth ddiweddaraf i ddioddefwyr trwy gydol yr ymchwiliad."

Cynyddodd y nifer o achosion o ymosodiadau gan gŵn yn ardal Heddlu'r Gogledd 32% rhwng 2021 a 2022.

Hyd at y 10 Hydref 2023 roedd y llu wedi ymateb i 422 o achosion, o'i gymharu â 461 trwy gydol 2022.

'Brawychus a phoenus'

Fe wnaeth dau ddaeargi Patterdale ymosod ar Mr Phillips yn Ebrill 2022 wrth iddo adael siop bapur newydd yn y dref.

"Roedd hi o gwmpas 06:30 ac o'n i yn cerdded nôl am adre ac heb unrhyw rybudd dyma'r ddau gi ma' yn mynd amdana i.

"Roedd o'n brofiad hynod o frawychus a phoenus.

"Unwaith mae ci fel yna yn cael gafael arnoch chi, mae'n anodd iawn cael nhw i ffwrdd.

"Fe ddoth perchennog y cŵn allan o'r tŷ i drio cael nhw o dan reolaeth ond erbyn hynny oedd o'n rhy hwyr, o'n i jest isio mynd o 'na, o'n i mewn sioc."

• 'Gallai gwahardd cŵn Bully XL achosi mwy o ymosodiadau'

• Croesawu bwriad i wahardd cŵn Bully XL Americanaidd

• Galw am newid 'sylfaenol' i ddeddfau cŵn peryglus

Gyda gwaed yn llifo lawr ei goesau fe lwyddodd Stephen Phillips i gyrraedd adref.

"Pan nes i gyrraedd y tŷ, roedd y wraig dal yn ei gwely a pan glywodd hi fi yn gweiddi roedd hi'n meddwl 'mod i wedi cael trawiad ar y galon," meddai.

"Pan welodd hi'r golwg oedd ar fy nghoesau dyma hi'n ffonio ambiwlans a ges i fy nghludo i'r ysbyty."

Yn ôl Mr Phillips bu'n rhaid iddo dderbyn triniaeth am yr anafiadau ar ei goesau am gyfnod o ddau fis.

Fis Ionawr eleni cafwyd perchennog y cŵn yn euog o fod yn cadw cŵn oedd allan o reolaeth i raddau peryglus.

Cafodd ddirwy o £120. Bu'n rhaid iddo hefyd dalu costau o £184 ac iawndal o £350 i Mr Phillips.

Bydd y gwaharddiad ar gŵn Bully XL yng Nghymru a Lloegr yn dod i rym ar 31 Rhagfyr

Mae pryderon Mr Phillips yn dod yn sgil sylw helaeth i ymosodiadau niferus gan gŵn.

Bydd gwaharddiad ar gadw cŵn Bully XL yng Nghymru a Lloegr yn dod i rym ar 31 Rhagfyr.

"Dwi ddim yn meddwl mai gwahardd cŵn fel Bully XLs yw'r ateb. Mae angen addysgu pobl sut i edrych ar ôl cŵn yn gyfrifol," meddai Mr Phillips.

"Does dim ffasiwn beth â chi peryg - perchnogion anghyfrifol yw'r broblem yn fy marn i.

"Dwi dal yn wary o gŵn dwi ddim yn adnabod ar ôl be' ddigwyddodd.

"Tydi fy ngolwg i ddim yn dda iawn a phan mae ci, dwi ddim yn 'nabod, yn dod amdana i dwi'n mynd yn nerfus braidd.

"Mae ymosodiad fel hyn yn bownd o gael effaith arnoch chi."