Marwolaethau Coedelái: Cynnal angladd Morgan Smith

Roedd Morgan Smith, 18, yn un o dri a fu farw yn y gwrthdrawiad

Mae cannoedd o bobl wedi mynychu angladd dyn 18 oed a fu farw mewn gwrthdrawiad yn Rhondda Cynon Taf fis diwethaf.

Roedd Morgan Smith, 18, yn teithio mewn car pan fu mewn gwrthdrawiad â bws yng Nghoedelái.

Bu farw dau arall - Jesse Owen, 18, a Callum Griffiths, 19 - yn y gwrthdrawiad, a chafodd dau arall yn eu harddegau eu cludo i'r ysbyty gydag anafiadau a oedd yn peryglu eu bywyd.

Fore Llun roedd 'na gymaint yn bresennol fel nad oedd lle iddyn nhw i gyd fynychu, gan adael llawer yn sefyll ar ochr y stryd yn Nhrewiliam yn gwrando ar y gwasanaeth ar uchelseinyddion.

• Marwolaethau Coedelái: Cynnal angladd Jesse Owen

• Enwi tri dyn ifanc fu farw mewn gwrthdrawiad car a bws

• Teuluoedd tri dyn ifanc fu farw yn rhoi teyrnged

Roedd nifer ohonynt tua'r un oed â Morgan ac yn gwisgo teis coch neu â rhubanau coch yn eu gwalltiau, gyda'r ceffylau du oedd yn tynnu'r hers hefyd wedi'u haddurno gyda phlu coch.

Roedd Morgan yn focsiwr dawnus a oedd yn gobeithio am yrfa yn y gamp.

Clywodd y rhai a fynychodd y gwasanaeth fod ganddo "ddyfodol disglair o'i flaen fel bocsiwr".

Roedd blodau wedi'u trefnu fel pâr o fenig bocsio ac eraill yn sillafu'r gair "champ".

Roedd nifer yn gwrando ar y gwasanaeth ar uchelseinyddion

Roedd blodau wedi'u trefnu fel pâr o fenig bocsio ac eraill yn sillafu'r gair "champ"

Clywodd y rhai a oedd yn bresennol ei fod yn "gariadus ac yn ofalgar" am ei fam, ei dad, ei frodyr a'i chwiorydd, aelodau eraill o'i deulu a ffrindiau.

Dywedodd ei deulu nad oedden nhw "erioed wedi cael y cyfle i ffarwelio" a diolchon nhw i'r gymuned am eu cefnogaeth ers marwolaeth Morgan.

Cafodd angladd Jesse Owens ei gynnal yr wythnos diwethaf mewn capel preifat yn Nhrewiliam.

Mae disgwyl i angladd Callum Griffiths gael ei gynnal yn ddiweddarach yn yr wythnos.