Cludo ar y copa: Codi cwestiynau

Mae rhai'n credu y dylai Cymro fod wedi cael ei ddewis i gludo'r ffagl i gopa'r Wyddfa

Mae rhai wedi beirniadu'r ffaith mai'r dringwr enwog, Syr Chris Bonington, gafodd y fraint o gludo'r fflam Olympaidd i gopa'r Wyddfa fore Mawrth.

Ar bumed diwrnod ei thaith o amgylch Cymru cyrhaeddodd y ffagl gopa uchaf Cymru a Lloegr.

Cafodd ei rhoi mewn lantern i'w chludo i fyny ar Reilffordd yr Wyddfa cyn i'r dringwr 77 oed ei chludo i'r copa, 1,085m (3,650 troedfedd) uwchlaw lefel y môr.

Dywedodd fod cario'r fflam i fyny'r mynydd ble y dechreuodd ei yrfa dringo yn "golygu llawer iawn."

'Braint'

"Mae'n fraint cael cludo'r ffagl ac ymuno â chludwyr eraill ar draws y DU ... mae'r holl beth yn anhygoel," meddai wedi'r profiad.

Dechreuodd ei yrfa yn dringo'r Wyddfa 61 mlynedd yn ôl.

Ond dyw pawb ddim yn hapus mai fo gafodd y fraint o gario'r fflam.

Mae John Ellis Roberts, cyn warden Parc Cenedlaethol Eryri a mynyddwr profiadol, wedi cwestiynu'r dewis.

'Digon o Gymry'

"Dwi yn meddwl y dylsan nhw fod wedi cael hyd i Gymro," meddai.

"Mae 'na ddigon o Gymry yn y byd mynydda i'w chario hi i'r darn diwetha' heb gael Sais yma."

Dywedodd ei fod yn teimlo bod hynny wedi tynnu oddi wrth yr holl achlysur.

"Ma' Bonington - ma' pawb yn ei 'nabod o - ond ma' gynnon ni Gymry - Eric Jones, John Disley wedi cael ei fagu fyny yng Nghorris, gweithio ym Mhlas y Brenin, Caradog Jones sy' wedi bod fyny Everest, digon ohonyn nhw.

"Ma'n biti na fasa'r bobl o gwmpas y trefniadau yng Nghymru wedi meddwl tipyn bach mwy am hyn, yn enwedig bod nhw 'di defnyddio'r Wyddfa."