'Bydd annibyniaeth yn cymryd hirach na'r gobaith'

Bydd annibyniaeth yn "cymryd hirach nag y byddwn yn ei obeithio", yn ôl arweinydd Plaid Cymru, Adam Price.

Roedd Mr Price wedi dweud yn y gorffennol y byddai Cymru'n annibynnol erbyn 2030.

Mae'n dweud na ddylai cefnogwyr "ddigalonni" ond ni allai awgrymu pryd y bydd modd sicrhau annibyniaeth.

Dywedodd wrth BBC Cymru bod rhaid "ystyried yr effeithiau pell ac edrych ar y darlun ehangach".

• Annibyniaeth i gael ei 'ystyried' gan gomisiwn

• Plaid yn galw am bleidlais cefnogwyr annibyniaeth Llafur

Y llynedd fe ddywedodd Mr Price y byddai Plaid Cymru'n cynnal refferendwm annibyniaeth o fewn pum mlynedd pe tai'n dod i rym yn etholiadau'r Senedd.

Awgrymodd y byddai Cymru'n wlad annibynnol erbyn 2030.

Fe ddaeth y blaid yn drydydd yn y bleidlais tu ôl i Lafur Cymru a'r Ceidwadwyr Cymreig.

Ond mae'r blaid wedi dod i gytundeb i gydweithio gyda'r Llywodraeth Lafur sy'n cynnwys polisïau'n ymwneud â phrydau ysgol am ddim i bob disgybl cynradd a mesurau i fynd i'r afael â'r argyfwng tai.

Mae 'na "fwyafrif fawr o blaid hunan-lywodraethu" yn y Senedd ers etholiadau 2021, medd Adam Price

Wrth siarad ar raglen Politics Wales, dywedodd Adam Price bod y flwyddyn ddiwethaf wedi bod "yn tipyn o rollercoaster" i'r blaid - o "siom" canlyniadau etholiad mis Mai i "lwyddiant annisgwyl" y cytundeb gyda Llafur.

Mae'r blaid ar "ffordd hir", meddai, wrth ddewis peidio awgrymu dyddiad pa bryd y bydd pobl yn gallu cymryd rhan mewn pleidlais annibyniaeth.

'Yr unig ateb tymor hir'

"Ry'n ni'n credu taw annibyniaeth yw'r unig ateb tymor hir cynaliadwy i'r heriau y mae Cymru'n eu hwynebu.

"Gan ddysgu o wers y llynedd, mae'n rhaid i ni sylweddoli bod, wrth gwrs, bydd rhai o'r pethau 'ma'n cymryd hirach nag y byddwn yn ei obeithio neu'n ei ragweld.

"Dyw hynny ddim yn golygu bod rhaid i ni ddigalonni mewn unrhyw ffordd...

"Er na wnaethon ni lwyddo yn ein nod yn yr etholiad, os edrychwch chi ar sefyllfa Cymru ar y cyfan fe welwch chi'r holl bleidiau oedd yn dymuno dileu'r Cynulliad [neu'r Senedd fel y mae bellach] yn colli cefnogaeth."

"Yn nhermau'r sefyllfa'n fras yn y Senedd mae gyda ni nawr fwyafrif fawr o blaid hunan-lywodraethu.

"Mae'n rhaid i chi ystyried yr effeithiau pell ac edrych ar y darlun ehangach."