James 'Cubby' Davies yn ymddeol o rygbi oherwydd effeithiau cyfergyd

Chwaraeodd James Davies 101 o weithiau i'r Scarlets

Mae blaenasgellwr Cymru a'r Scarlets James Davies wedi cyhoeddi ei fod yn ymddeol o rygbi oherwydd effeithiau cyfergyd.

Dyw'r chwaraewr 31 oed, sy'n cael ei adnabod fel Cubby, heb chware ers ennill ei 11eg i Gymru yn erbyn Georgia yn Hydref 2020.

"Rwy' wedi mwynhau pob munud o fy ngyrfa yma gyda'r Scarlets ac wedi gwneud ffrindiau anhygoel tra yma," meddai Davies, sy'n frawd i'r canolwr rhyngwladol Jonathan Davies.

"Ond ar ôl siarad gydag arbenigwyr mae'n eitha' clir na alla i barhau i chwarae.

• Galw ar y byd rygbi i gyflwyno rheolau fel yr NFL

• 'Un tymor' o rygbi yn gallu effeithio ar yr ymennydd

"Ar hyn o bryd, diolch byth, rwy'n gallu byw bywyd normal, rhywbeth o'n i methu ei wneud am amser hir ar ôl cael y gnoc.

"Gallai unrhyw ergyd i'r pen wrth hyfforddi neu mewn gêm olygu fod e'n mynd i ddechrau hyn oll eto, sy'n rhywbeth dwi ddim eisiau ystyried," meddai.

"Ma' fe 'di bod yn gyfnod anodd, ond mae'r gefnogaeth dwi wedi ei gael gan fy nheulu, ffrindiau, cyd-chwaraewyr a hyfforddwyr wedi bod yn anhygoel, a dwi'n ddiolchgar iawn am hynny."

James Davies yw brawd iau y canolwr rhyngwladol Jonathan Davies.

Fe chwaraeodd Davies ei gêm gyntaf i'r Scarlets yn 2013, gan ymddangos 101 o weithiau i'r rhanbarth.

Dywedodd prif hyfforddwr y Scarlets, Dwayne Peel: "Mae Cubby wedi bod yn chwaraewr rhyfeddol ac un un o fawrion y Scarlets, chwaraewr oedd yn rhoi popeth i'r crys ac roedd yn gymeriad mawr."

Dywedodd hyfforddwr Cymru, Wayne Pivac, ei fod yn drist o glywed y newyddion am ymddeoliad Davies.

"Roeddwn yn ddigon ffodus i'w hyfforddi ar lefel clwb ac ar lefel gwlad," meddai. "Nid yn unig yw e yn chwaraewr da ond mae'n berson da hefyd."