Penodi Lynn yn brif hyfforddwr tîm rygbi merched Cymru

Mae Sean Lynn wedi bod yn brif hyfforddwr tîm merched Hartpury-Caerloyw

Mae Undeb Rygbi Cymru wedi cadarnhau Sean Lynn fel prif hyfforddwr tîm cenedlaethol y merched.

Mae'r Cymro wedi bod yn brif hyfforddwr tîm llwyddiannus merched Hartpury-Caerloyw.

Bydd yn olynu Ioan Cunningham, adawodd ei swydd ym mis Tachwedd wedi tair blynedd wrth y llyw ac wedi 2024 gythryblus.

Sicrhaodd Cymru bedair buddugoliaeth yn unig mewn 11 o gemau prawf yn ystod y flwyddyn.

Roedd URC hefyd wedi cyfaddef y bu methiannau difrifol yn y ffordd y cafodd trafodaethau cytundeb tîm y merched eu cynnal.

Gyda Chymru'n 10fed ar restr detholion y byd, Lynn sydd wedi cael y cyfrifoldeb o drawsnewid gobeithion y tîm cenedlaethol.

Roedd buddugoliaeth o 31-24 yn erbyn Awstralia mewn gêm gyfeillgar ym mis Medi yn uchafbwynt prin yn ystod 2024 anodd i'r merched

Cyn troi at hyfforddi, chwaraeodd Lynn i dimau ieuenctid Caerloyw ac roedd yn gapten tîm Prifysgol Hartpury.

Yn fewnwr, cynrychiolodd tîm dan-18 Cymru a thîm myfyrwyr Cymru.

Cafodd ei benodi'n bennaeth rygbi merched yng Nghaerloyw yn 2019, lle bu'n goruchwylio pob agwedd o'r ddarpariaeth rygbi yng Ngholeg a Phrifysgol Hartpury.

Mae hefyd wedi bod yn brif hyfforddwr tîm Hartpury-Caerloyw - pencampwyr Uwchgynghrair y Merched yn Lloegr am y ddwy flynedd ddiwethaf.

Mae carfan Hartpury-Caerloyw yn cynnwys sawl aelod o garfan Cymru - yn eu mysg y capten Hannah Jones.

Bydd Lynn yn cydweithio'n agos gyda phennaeth rygbi merched Undeb Rygbi Cymru, Belinda Moore, yn dilyn ei phenodiad yr wythnos ddiwethaf.