Cyn-weinidog Ceidwadol eisiau sefyll dros Reform
Fe wnaeth Sarah Atherton adael y Blaid Geidwadol ym mis Awst
- Cyhoeddwyd
Mae'r cyn-weinidog Ceidwadol, Sarah Atherton, yn dweud ei bod wedi ymuno â Reform UK a'i bod eisiau sefyll dros y blaid yn etholiad y Senedd ym mis Mai.
Mae hi eisiau bod yn ymgeisydd yn etholaeth newydd Fflint Wrecsam, a dywedodd wrth y BBC fod hynny oherwydd ei phryderon ynghylch "colli hunaniaeth genedlaethol a phwysau ar wasanaethau cyhoeddus".
Ychwanegodd ei bod wedi "cael digon ar y 26 mlynedd o ddirywiad yng Nghymru o dan y cytundeb rhwng Llafur a Phlaid Cymru".
Mae Reform ar hyn o bryd yn y broses o benderfynu pwy fydd eu hymgeiswyr ar gyfer mis Mai nesaf.
Cyn-AS yn gadael y Ceidwadwyr ond am sefyll am y Senedd
- Cyhoeddwyd20 Awst
Dim egwyddorion gan Aelod o'r Senedd newydd Reform, meddai'r Torïaid
- Cyhoeddwyd23 Gorffennaf
Aelod o Senedd Cymru wedi gadael y Ceidwadwyr am Reform
- Cyhoeddwyd22 Gorffennaf
Fe wnaeth Ms Atherton adael y Blaid Geidwadol ym mis Awst, ar ôl dweud y llynedd y dylai'r Ceidwadwyr "gofleidio" Nigel Farage a Reform.
Fe ddywedodd ar y pryd fod y Ceidwadwyr yn "analluog" ac nad oedden nhw bellach yn "cyd-fynd â'm gwerthoedd".
Sarah Atherton oedd y Ceidwadwr cyntaf i gynrychioli etholaeth Wrecsam, ers ei chreu ym 1918
Collodd Ms Atherton sedd Wrecsam yn San Steffan i Lafur, yn etholiad cyffredinol 2024.
Bu - am gyfnod byr yn 2022 - is-ysgrifennydd gwladol dros y gweithlu amddiffyn, cyn-filwyr a theuluoedd y lluoedd arfog.
O dan drefn newydd etholiad y Senedd, bydd 16 sedd yn ethol chwe aelod yr un, gyda'r aelodau yn cael eu dewis o restrau'r pleidiau.
Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.
Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.
Lawrlwythwch yr ap am y diweddaraf o Gymru ar eich dyfais symudol.