Ceidwadwyr: 'Angen plismyn mewn ardaloedd gwledig'

Mae'r Ceidwadwyr yn dweud bod sicrhau bod heddlu'n cael eu lleoli mewn ardaloedd gwledig yn un o brif flaenoriaethau'r blaid ar gyfer etholiadau'r Comisiynwyr Heddlu a Throsedd yr wythnos hon.

Er bod lefelau trosedd wedi gostwng, dywed y blaid eu bod yn dal yn rhy uchel, a byddai comisiynwyr Ceidwadol yn gweithio i sicrhau eu bod yn parhau i ostwng.

Wrth siarad tra’n ymgyrchu, dywedodd Ysgrifennydd Cymru, David TC Davies: "Er bod trosedd wedi gostwng ar draws y Deyrnas Unedig, mae'n dal yn rhy uchel, ac rydym wedi cynnig tîm gwych o ymgeiswyr sy'n mynd i fod yno i gefnogi'r heddlu, ond sydd hefyd yn cefnogi dioddefwyr trosedd a sicrhau bod lefel troseddu yn gostwng ymhellach."

Wrth drafod y toriadau i nifer yr heddlu a wnaed gan Lywodraeth Geidwadol y DU dan arweiniad David Cameron ar ôl 2010, dywedodd Mr Davies: "Mae gennym ni fwy o heddlu nawr nag yn 2010.

"Ry’n ni wedi cynyddu nifer yr heddweision, ac ry’n ni wedi edrych yn ofalus ar faterion fel 'stopio ag archwilio', ac wedi cyflwyno polisïau nawr sy'n rhoi'r pwerau sydd eu hangen ar yr heddlu."

Ychwanegodd: "O ganlyniad i hynny, ry'n ni wedi gweld gostyngiad mewn troseddau treisgar.

"Felly rwy'n credu y gall pobl ymddiried yn y Ceidwadwyr a byddan nhw’n gwybod mai'r blaid Geidwadol yw plaid cyfraith a threfn."

Dywedodd y byddai gwella plismona gwledig yn flaenoriaeth.

"Yn amlwg rôl y comisiynydd yw dwyn y prif gwnstabl i gyfrif, a sicrhau bod y blaenoriaethau plismona yn adlewyrchu anghenion yr ardal, felly byddwn yn edrych, er enghraifft, ar sicrhau bod yr heddlu wedi'u lleoli mewn ardaloedd gwledig."

Er nad yw Comisiynwyr Heddlu a Throsedd yn gyfrifol am benderfyniadau ynglŷn â gwaith dydd i ddydd yr heddlu, maen nhw'n gosod blaenoriaethau a chyllideb flynyddol ar gyfer pob ardal.

Yng Nghymru mae pedwar Comisiynydd, un ar gyfer pob ardal blismona - De Cymru, Gwent, Dyfed-Powys, a Gogledd Cymru.

Mae'r prif bleidiau yng Nghymru - Llafur, y Ceidwadwyr, Plaid Cymru a'r Democratiaid Rhyddfrydol - i gyd yn cynnig ymgeiswyr ym mhob ardal.

Ar hyn o bryd ymgeiswyr Llafur sydd yn gomisiynwyr yng Ngwent, Gogledd Cymru a De Cymru, tra bod ymgeisydd Plaid Cymru yn gomisiynydd yn Nyfed-Powys.

Pwy sy'n sefyll y tro hwn?

Dyfed-Powys

• Justin Griffiths, Democratiaid Rhyddfrydol Cymru

• Ian Harrison, Ceidwadwyr Cymreig

• Dafydd Llywelyn, Plaid Cymru

• Philippa Ann Thompson, Llafur Cymru

Gwent

• Donna Cushing, Plaid Cymru

• Mike Hamilton, Democratiaid Rhyddfrydol Cymru

• Hannah Jarvis, Ceidwadwyr Cymreig

• Jane Mudd, Llafur Cymru

Gogledd Cymru

• Andy Dunbobbin, Llafur Cymru

• Ann Griffith, Plaid Cymru

• Brian Jones, Ceidwadwyr Cymreig

• David Richard Marbrow, Democratiaid Rhyddfrydol Cymru

De Cymru

• Sam Bennett, Democratiaid Rhyddfrydol Cymru

• George Carroll, Ceidwadwyr Cymreig

• Dennis Clarke, Plaid Cymru

• Emma Wools, Llafur Cymru