34 artist i dderbyn cefnogaeth wrth i Gorwelion ddathlu 10

Y 34 o artistiaid fydd yn derbyn cefnogaeth gan gynllun Gorwelion eleni

Mae prosiect Gorwelion wedi cyhoeddi'r 34 o artistiaid fydd yn derbyn cefnogaeth ariannol yn 2025 - degawd ers lansio'r cynllun.

Ymhlith y cerddorion fydd yn derbyn cyfran o gronfa gwerth £60,000 eleni mae; Buddug, Cyn Cwsg, Marged a Talulah.

Mae eleni'n flwyddyn arbennig i Gorwelion gan eu bod yn dathlu degawd ers lansio'r cynllun sydd a'r nod o roi llwyfan ehangach i gerddoriaeth o Gymru.

Dywedodd Buddug, un o'r artistiaid fydd yn derbyn arian gan y Gronfa Lansio eleni, fod cefnogaeth o'r fath yn "bwysig iawn i artistiaid Cymraeg, yn enwedig rhai ifanc".

Yn ystod y 10 mlynedd diwethaf mae dros 450 o artistiaid wedi bod yn rhan o wahanol brosiectau Gorwelion.

Ymhlith y'r artistiaid amlycaf i gael cymorth dros y blynyddoedd mae Adwaith, Melin Melyn, Buzzard Buzzard Buzzard a LEMFRECK.

Yn ôl Gorwelion, mae'r cyllid yma wedi bod yn "hollbwysig" wrth roi cyfle i artistiaid ddatblygu eu gyrfaoedd.

• Pwy oedd yn rhan o'r cynllun Gorwelion cyntaf?

• Bethan Elfyn yn edrych yn ôl ar waith cynllun Gorwelion

Mae arian o'r Gronfa Lansio yn aml yn cael ei ddefnyddio i fynd i recordio, hyrwyddo deunydd, prynu offer neu greu fideos cerddorol.

Y Loteri Genedlaethol sy'n rhoi cyllid i Gronfa Lansio Gorwelion, a Chyngor Celfyddydau Cymru sy'n dyrannu'r arian.

Mae Buddug yn gobeithio defnyddio'r arian i recordio ei halbwm gyntaf

Mae Buddug, artist ifanc o Lanrug yng Ngwynedd, ymhlith y rhai sydd wedi eu dewis i fod yn rhan o'r cynllun eleni.

Mae hi eisoes wedi rhyddhau dwy gan, 'Dal Dig' ac 'Unfan' ar label Recordiau Cosh, a'r gobaith nawr yw mynd ati i weithio ar ei halbwm gyntaf.

"O'n i'n really excited pan nes i glywed bo' fi 'di cael fy newis, ma'n compliment mewn ffordd, a fydd o'n lot fawr o help," meddai.

"Dwi ar flwyddyn allan eleni ac yn gobeithio gallu recordio dipyn, felly bydd y pres yma yn lot o help.

"Os dwi'n gallu defnyddio'r pres yma i recordio, mae'n golygu, gobeithio, y byddai'n gallu cael mwy o bres allan ohono fo fy hun - sy'n bwysig iawn, yn enwedig pan ti'n dechrau."

Ychwanegodd fod cynlluniau fel Gorwelion yn bwysig i artistiaid sydd yn dal i ddatblygu: "Does gan lot ddim y means i fynd ati i recordio, ac mae'r ffaith bo' 'na lot o fandiau ifanc yn cael eu dewis yn grêt.

"Gobeithio fydda i'n gwneud contacts a bydd 'na wastad gyfle i ofyn am gyngor os oes angen hefyd."

Mae Llinos Emanuel o Gaerfyrddin yn un o'r artistiaid fydd yn cael eu cefnogi eleni

Dywedodd Llinos Emanuel o Gaerfyrddin, un arall o'r artistiaid fydd yn derbyn arian eleni: "Rwy' ar ben fy nigon fy mod i'n un o'r rheiny sy'n cael arian gan y Gronfa Lansio yn 2025.

"Bydd hyn yn hwb a hanner i fy ngyrfa, ac rwy'n edrych ymlaen yn fawr iawn at fynd i'r stiwdio i recordio fy mhrosiect newydd."

Ychwanegodd LUVLY, un arall o'r artistiaid ymhlith y casgliad o 34, ei fod am ddefnyddio'r arian i ddatblygu cynllun cerddorol yng Nghaerdydd.

"Drwy Gronfa Lansio Gorwelion, rwy'n edrych ymlaen at ddod â chymuned greadigol Caerdydd at ei gilydd fel rhan o brosiect ar y cyd sy'n hybu doniau lleol, yn dathlu diwylliant, ac yn rhoi siâp i'r sŵn mawr nesaf o'r Deyrnas Unedig."

Bethan Elfyn yw Rheolwr Prosiect Gorwelion

Dywedodd Bethan Elfyn, Rheolwr Prosiect Gorwelion - sydd wedi bod wrth y llyw ers y dechrau - ei bod yn gyfnod cyffrous iawn.

"Ar ôl dathlu degawd o raglen Gorwelion yn ddiweddar, mae'n hyfryd gallu dechrau'r calan hwn drwy ddathlu a darganfod pob mathau o ddoniau newydd," meddai.

"Mae hwn yn teimlo'n gyfnod hynod o gyffrous yn y byd cerddoriaeth yng Nghymru, ac rydyn ni wrth ein boddau ein bod ni'n gallu cefnogi'r grŵp hwn o artistiaid eleni mewn ffordd ymarferol a phenodol.

"Mae ein diolch, fel wastad, i'n partneriaid yn BBC Cymru a Chyngor Celfyddydau Cymru. Maen nhw wedi annog cymaint o greadigrwydd cynnar yn y celfyddydau drwy'r gronfa hon, ac wedi cefnogi Gorwelion i ddatblygu doniau dros y 10 mlynedd anhygoel ddiwethaf."

Yr artistiaid fydd yn derbyn arian yn 2025:

Bau Cat, Ben Ellis, Blue Amber, Bruna Garcia, Buddug, Charlie J, Cyn Cwsg, Dan's People, em koko, Freyja Elsy, Guilty Party, Jessika kay, Klust / UNTRO, Korrupted, lemongel, LICO, Llinos Emanuel, LOYD, LUVLY, Malgola No, Malika blu, Marged, Moletrap, Monet, Nancy Williams, Nathan Misra, Ofnus, Plastic Estate, Pseudo Cool, Shale, SHLUG, Sleep Outside, Source, Talulah.