Aelodau newydd yn 'ofni' estyniad i broses Brexit

Mae Nathan Gill yn rhagweld Tŷ'r Cyffredin yn rhwystro Brexit heb gytundeb

Mae dau Aelod Seneddol Ewropeaidd (ASE) Plaid Brexit yng Nghymru yn "ofni" y bydd estyniad arall i'r broses Brexit.

Mae'r DU i fod i adael yr Undeb Ewropeaidd ar 31 Hydref ond mae Nathan Gill a James Wells yn credu y bydd Tŷ'r Cyffredin yn rhwystro Brexit heb gytundeb.

Dywedodd Mr Wells fod y "rhan fwyaf" o aelodau Plaid Brexit yn credu y bydd etholiad cyffredinol yn yr hydref.

Dywedodd Jill Evans o Blaid Cymru a Jackie Jones o Lafur - y ddau ASE arall yng Nghymru - eu bod yn obeithiol y byddai'r broses yn cael ei gohirio.

Enillodd Plaid Brexit ddwy sedd Gymreig ym mis Mai, gan ddod i'r brig yn 19 o'r 22 ardal cyngor.

• 'Refferendwm arall' medd y Prif Weinidog

• Cyhuddo Drakeford o 'hel bwganod' ar Brexit

Ar ddiwrnod cyntaf y Senedd Ewropeaidd newydd ddydd Mawrth, trodd ASEau Plaid Brexit eu cefnau yn ystod 'Ode To Joy' - anthem yr UE.

"Fe wnaethon ni droi ein cefnau arno oherwydd, a dweud y gwir, nid ydym yn cydnabod y dylai'r Undeb Ewropeaidd, sefydliad, gael ei anthem ei hun a'i faner ei hun," meddai'r ASE Nathan Gill.

Dywedodd cyn-ASE UKIP ei fod yn disgwyl iddo barhau yn ei swydd y tu hwnt i ddiwedd y cyfnod presennol ar gyfer trafodaethau Brexit "oherwydd ni allaf weld y mecanwaith sy'n golygu bod newid arweinydd y Blaid Geidwadol ac felly'r prif weinidog yn arwain at newid yn San Steffan".

Pan gafodd ei holi a oedd yn falch o glywed y cystadleuwyr ar gyfer arweinyddiaeth y Ceidwadwyr - Boris Johnson a Jeremy Hunt - yn codi'r posibilrwydd y byddai'r DU yn gadael yr Undeb heb gytundeb ar 31 Hydref, dywedodd Mr Gill: "Mae'n galonogol i mi ond rwyf dal yn amheus iawn."

Mae Jackie Jones o Lafur am weld refferendwm arall ar aelodaeth o'r UE

Dywedodd James Wells, ASE arall Plaid Brexit yng Nghymru, sydd wedi cael ei ethol i wleidyddiaeth rheng flaen am y tro cyntaf: "Dydw i ddim wir eisiau bod yma ar ôl mis Hydref ond rwy'n ofni mae'n debyg y byddwn ac y byddwn yn cael etholiad cyffredinol lle y bydd Plaid Brexit yn rhedeg ym mhob sedd ar gyfer San Steffan.

"Mae'r rhan fwyaf ohonom yn y blaid yn disgwyl y bydd etholiad cyffredinol yn yr hydref."

Mae ASE Llafur yng Nghymru, Jackie Jones, hefyd wedi'i hethol i'r seneddau Ewropeaidd yn Strasbourg a Brwsel am y tro cyntaf.

"Mae wedi bod yn gyffrous iawn a hefyd yn drwm iawn oherwydd mae'n rhaid i chi sefydlu swyddfa, mynd i Frwsel, mynd i gyfarfodydd grŵp a chwrdd â llawer o bobl newydd," meddai.

'Cyfnod anodd iawn'

Gorffennodd ei phlaid yn drydydd yn yr etholiadau Ewropeaidd mis Mai y tu ôl i Blaid Cymru am y tro cyntaf erioed.

Yn ystod yr ymgyrch, roedd y pedwar ymgeisydd Llafur yng Nghymru yn llwyr gefnogol o refferendwm arall, tra roedd y blaid yng Nghymru ac ar draws y DU yn ei gefnogi fel opsiwn.

Dywedodd Ms Jones: "Pe byddem wedi cael neges gliriach… byddai hynny wedi bod yn ddefnyddiol ond rwy'n deall yn llwyr, ac fe wnaethom ni i gyd, ac rwy'n dal i gytuno bod gennym ni rheiny sydd eisiau gadael a rheiny sydd eisiau aros yng Nghymru a ledled y DU ac mae'n iawn ein bod yn ystyried eu pryderon."

Dywedodd y cyn-ddarlithydd ei bod yn "falch iawn" bod Llafur Cymru bellach wedi newid polisi i gefnogi refferendwm arall a'i bod yn "obeithiol" y byddai Llafur yn San Steffan yn gwneud yr un peth.

Dywedodd Jill Evans (canol) nad oes modd "symud ymlaen" heb ail refferendwm

Mae Plaid Cymru wedi bod yn llwyr gefnogol o refferendwm arall ers i Adam Price ddod yn arweinydd y blaid.

Mewn ateb i'r cwestiwn a fyddai pleidlais arall yn dyfnhau'r rhaniadau mewn cymdeithas, dywedodd ASE Plaid Cymru, Jill Evans: "Mae angen gwneud llawer o waith i wella'r rhaniadau ond ar gyfer gwneud penderfyniad mor fawr [Brexit heb gytundeb] pan fydd dim sicrwydd am swyddi pobl, am ddyfodol pobl, ni allwn symud ymlaen fel hynny.

"Ni ddylem hyd yn oed ei ystyried hyd oherwydd bydd e mor ddrwg."

"Dydw i ddim yn meddwl y gallwn wneud penderfyniad mor ddychrynllyd sy'n mynd i effeithio ar Gymru am ddegawdau i ddod, a gwn fod pobl wedi cael llond bol ar y dadleuon, a gwn fod pobl wedi cael llond bol ar siarad am Brexit a dim byd arall… ond mae gadael heb gytundeb yn golygu y byddwn yn siarad amdano am 10, 15, 20 mlynedd i ddod.

"Nid diwedd y dadlau fyddai hynny, ond dechrau cyfnod anodd iawn," ychwanegodd.