Gwrthod tystiolaeth newydd llofruddiaethau Clydach

Mandy Power a'i dwy ferch Katie ac Emily gafodd eu llofruddio yn eu cartref yng Nghlydach yn 1999

Mae Heddlu De Cymru wedi cyhoeddi nad yw euogfarn David Morris wedi cael ei thanseilio ar ôl iddyn nhw asesu tystiolaeth newydd yn gysylltiedig â llofruddiaethau Clydach yn 1999.

Cafodd Morris ei garcharu yn 2006 am guro pedwar aelod o'r un teulu i farwolaeth yn eu cartref yn y pentref yn 1999 - Mandy Power, ei mam oedrannus, Doris Dawson, a'i phlant Katie ac Emily, oedd yn 10 ac wyth oed.

Mewn rhifyn o gyfres faterion cyfoes Wales Investigates BBC Cymru fe ddaeth dau dyst newydd i'r amlwg.

Fe wnaethon nhw ddisgrifio beth roedden nhw yn ei gofio am noson y llofruddiaethau.

Ar gais cyfreithwyr Morris, ym mis Ionawr 2021 fe gyhoeddodd Heddlu De Cymru eu bod am asesu tystiolaeth benodol gafodd ei chyflwyno gan y rhaglen.

Erbyn hyn mae Heddlu De Cymru, ar ôl cael cyngor gan Wasanaeth Erlyn y Goron, wedi cadarnhau nad ydy gwybodaeth y tystion newydd yn amharu ar yr euogfarn.

Mewn datganiad dywedodd llefarydd ar ran Heddlu De Cymru: "Fel rhan o'r gwaith yma mae ditectifs wedi siarad gyda'r ddau dyst ac mae Gwasanaeth Erlyn y Goron wedi cynghori nad oes yna wybodaeth wedi ei chyflwyno sy'n tanseilio euogfarn David Morris."

Cafodd David Morris ei garcharu am oes am lofruddiaethau Clydach

Adolygiad fforensig

Ond fe gadarnhaodd y datganiad hefyd y bydd ymchwiliad yn cael ei gynnal i dystiolaeth fforensig newydd gafodd ei chyflwyno gan Wales Investigates.

Bydd hynny yn digwydd dan oruchwyliaeth ditectifs o Heddlu Dyfnaint a Chernyw.

"Tra bydd y gwaith yma yn parhau, mae ein meddyliau yn aros gyda'r teuluoedd a'r rhai gafodd eu heffeithio gan yr achos yma a'r effaith sylweddol mae e wedi ei gael arnyn nhw."

Fe gafodd David Morris ei garcharu am oes yn wreiddiol yn 2002 ond fe gafodd yr euogfarn honno ei diddymu ar ôl apêl.

Ond daeth y rheithgor y ei ail achos i'r casgliad bod Morris yn euog ac fe gafodd ei ddedfrydu i 32 mlynedd dan glo.