Logan Mwangi: 'Dal angen gwella gwasanaethau cyngor sir'

Cafodd Logan Mwangi ei ladd ddiwedd Gorffennaf 2021

Mae yna welliannau wedi bod yn y gwasanaethau plant sy'n cael eu darparu gan Gyngor Pen-y-bont ar Ogwr ers i fachgen pump oed gael ei lofruddio gan ei deulu, yn ôl arolygwyr.

Ond dywed adroddiad gan Arolygaeth Gofal Cymru fod yna dal angen mwy o welliannau o ran yr awdurdod.

Cafodd Logan Mwangi ei lofruddio gan ei fam, ei lystad a llanc yn ei arddegau.

Cafwyd hyd i'w gorff yn Afon Ogwr yn agos i'w gartref yn Sarn ym mis Gorffennaf 2021.

Cafodd ei fam Angharad Williamson, ei lystad John Cole a Craig Mulligan - a oedd yn 13 oed ar adeg marwolaeth Logan - eu dedfrydu i garchar am oes.

• Mam, llystad a llanc yn euog o lofruddio Logan Mwangi

• Logan Mwangi: 'Cyfle wedi ei golli i'w ddiogelu'

Fe wnaeth arolygwyr gynnal eu harchwiliad fis Tachwedd, a bu arolwg tebyg ym Mai 2022.

Nôl ym mis Mai fe wnaeth yr arolygwyr danlinellu pwysau o ran y galw ar wasanaethau plant a'r ffaith fod yna brinder o weithwyr cymdeithasol.

Erbyn hyn, dywed yr arolygwyr fod Cyngor Pen-y-bont ar Ogwr wedi cymryd "camau sylweddol" i fynd i'r afael â recriwtio a chadw staff ond fod yna "bwysau sylweddol" yn parhau ar y gwasanaethau.

Dywed yr adroddiad fod y cyngor yn defnyddio nifer fawr o staff asiantaethau.

"Mae'r sefyllfa o ran y gweithlu yn parhau yn fregus," meddai'r adroddiad a bod hyn yn "risg sylweddol" wrth i'r awdurdod gesio gwella'r sefyllfa.

Cafodd Angharad Williamson, 31, Craig Mulligan, 14, a John Cole, 40, eu dedfrydu i garchar am oes

Yn ôl yr arolygwyr mae'r cyngor yn parhau i flaenoriaethu sicrhau staff digonol a chynaliadwy gan gynnwys ceisio denu staff o wledydd eraill.

Dywedodd Jane Gebbie, aelod o gabinet Cyngor Pen-y-bont ar Ogwr sydd â chyfrifoldeb am wasanaethau cymdeithasol, fod yr adroddiad yn dangos ymroddiad y cyngor i gryfhau gwasanaethau plant yn y sir.

Ychwanegodd y byddan nhw'n parhau i gydweithio gydag Arolygaeth Gofal Cymru.