Caerdydd: Camsillafu enw Rhodri Morgan ar arwyddion stryd

Rodri Morgan Way

Mae'r arwyddion anghywir yn rhan o ddatblygiad y Mill yn ardal Treganna

Bydd arwyddion stryd a oedd wedi camsillafu enw cyn-Brif Weinidog Cymru mewn stad o dai yng Nghaerdydd yn cael eu newid, medd y datblygwr a'r cyngor.

Roedd Cyngor Caerdydd wedi dweud nad eu cyfrifoldeb nhw oedd dau arwydd ffordd sy'n camsillafu enw Rhodri Morgan.

Mae'r arwyddion yn ardal Treganna - rhan o ddatblygiad y Mill - yn darllen "Rodri Morgan Way".

Cafodd lluniau o'r arwyddion eu rhoi ar Twitter, ond yn ôl y cyngor, gan ei bod yn ffordd breifat, cyfrifoldeb y datblygwyr Lovell Homes yw'r arwyddion.

"Mae'r ffordd hon yn un preifat ac mae'r datblygwr yn gyfrifol am gynhyrchu a chynnal yr arwyddion," meddai Cyngor Caerdydd ar Twitter yn wreiddiol.

Nid yw’r post yma ar Twitter yn gallu ymddangos yn y porwr. Os gwelwch yn dda defnyddiwch Javascript neu geisio eto ar borwr gwahanol.Gweld y cynnwys gwreiddiol ar Twitter.
Nid yw'r BBC yn gyfrifol am gynnwys safleoedd allanol
I osgoi neges twitter gan Cadi Rhys

Caniatáu cynnwys Twitter?

Mae’r erthygl hon yn cynnwys deunydd gan Twitter. Gofynnwn am eich caniatâd cyn llwytho unrhyw beth, gan y gallai Twitter ddefnyddio cwcis neu dechnoleg arall. Mae’n bosib eich bod am ddarllen polisi cwcis Twitter a pholisi preifatrwydd cyn derbyn. Er mwyn gweld y cynnwys dewiswch ‘derbyn a pharhau’.

Nid yw'r BBC yn gyfrifol am gynnwys safleoedd allanol

'Camgymeriad dynol'

Ond mewn datganiad ar y cyd yn ddiweddarach ddydd Mercher, dywedodd Lovell Homes a Chyngor Caerdydd: "Rydym wedi cael gwybod am gamsillafu Ffordd Rhodri Morgan yn natblygiad The Mill yng Nghaerdydd, a oedd o ganlyniad i gamgymeriad dynol.

"Mae arwyddion stryd newydd eisoes wedi'u harchebu a byddan nhw'n cael eu gosod cyn gynted â phosib."

Getty Images

Bu farw Rhodri Morgan yn 2017 yn 77 oed

Roedd Rhodri Morgan, fu farw yn 2017, yn brif weinidog rhwng 2000 a 2009.

Mae ei wraig, Julie Morgan, yn Aelod o Senedd Cymru ar gyfer Gogledd Caerdydd.

Dywedodd Ms Morgan wrth BBC Cymru: "Roedd hi'n hyfryd clywed fod stryd wedi cael ei henwi er cof am fy niweddar ŵr a phrif weinidog, Rhodri Morgan.

"Yn arbennig felly gan fod y stryd yng nghalon y gymuned roedd yn arfer ei chynrychioli yn San Steffan a'r Senedd.

"Mae'n biti fod yr arwydd wedi cael ei gamsillafu, ac rwy'n gobeithio y bydd yn cael ei gywiro."

Dywedodd y Cynghroydd Stephen Cunnah ei bod hi'n "amlwg sut mae sillafu Rhodri"

Dywedodd Stephen Cunnah, cynghorydd ward Treganna: "Dwi tipyn bach yn anhapus. Roedd yn gamgymeriad od.

"I fi mae'n amlwg sut i sillafu Rhodri yn Gymraeg."

Ychwanegodd: "Fe ddylai'r stori fod am Rhodri a'i gyfraniad o i'r stad yma o dai."

Pynciau cysylltiedig

Straeon perthnasol