Eve Smith: Cynnal angladd un o'r tri a fu farw yn Llaneirwg

Roedd Eve Smith a'i chyd-deithwyr ar goll am bron i 48 awr cyn i'w cerbyd gael ei ganfod

Mae angladd un o'r tri pherson ifanc a gafodd eu lladd mewn gwrthdrawiad ar gyrion Caerdydd ddechrau Mawrth wedi cael ei gynnal yng Nghasnewydd.

Bu farw Eve Smith, oedd yn 21 oed ac yn byw yn y ddinas, wedi i'r car yr oedd hi'n teithio ynddo fynd oddi ar yr A48 yn ardal Llaneirwg yn yr oriau mân fore Sadwrn 1 Mawrth.

Cafodd angladdau'r ddau berson arall a fu farw yn y gwrthdrawiad - Rafel Jeanne, 24, a Darcy Ross, 21 - eu cynnal yn gynharach yn y mis.

Bu'n rhaid i ddau ffrind arall oedd yn y car - Shane Loughlin, 32, a Sophie Russon, 20 - gael triniaeth ysbyty, ond y gred yw bod Mr Loughlin wedi cael gadael yr ysbyty erbyn hyn.

• Teyrnged tad i ferch y cafwyd hyd iddi'n farw mewn car

• Llaneirwg: Agor cwest i farwolaethau tri pherson

Arch Eve Smith yn cael ei chludo i'r Gadeirlan

Fe wisgodd y cannoedd o alarwyr yn Eglwys Gadeiriol Sant Gwynllyw ddillad du gydag ychydig o binc er cof am Ms Smith.

Roedd yna gerbyd a cheffyl ar flaen yr orymdaith o gerbydau angladdol, oedd hefyd yn cynnwys criw o feicwyr modur.

Bu'n rhaid i lawer sefyll tu allan i'r gadeirlan i wrando ar y gwasanaeth a gafodd ei ddarlledu ar uchel seinyddion.

Cafodd yr angladd ei gynnal yn Eglwys Gadeiriol Sant Gwynllyw

Roedd bron i 48 awr wedi mynd heibio cyn i'r awdurdodau ddod o hyd i'r car, am 00:15 ddydd Llun 3 Mawrth.

Mae ffrindiau i'r pump oedd yn y car yn honni mai nhw ddaeth o hyd i'r car gyntaf ar ôl sylwi ar draciau teiars.

Cyn hynny, roedd perthnasau a ffrindiau wedi apelio dros y penwythnos am gymorth i chwilio amdanyn nhw wedi iddyn nhw fethu â dychwelyd adref ar ôl noson allan.

Mae Swyddfa Annibynnol Ymddygiad yr Heddlu (IOPC) yn cynnal ymchwiliad i'r ffordd yr ymatebodd heddluoedd Gwent a De Cymru i adroddiadau fod y pump ar goll cyn iddyn nhw gael eu canfod.