Pêl-droed: 'Rob Page yn haeddu amser i wneud yn iawn'

Cynyddu mae'r pwysau ar Rob Page wedi i Gymru ond ennill un o'u 12 gêm diwethaf ym mhob cystadleuaeth

Nid yw un o gyn-chwaraewr Cymru yn disgwyl i Rob Page golli ei swydd er yr holl bwysau sydd arno yn dilyn canlyniadau diweddar.

Yn dilyn y golled annisgwyl yn erbyn Armenia, roedd colli eto o 2-0 yn erbyn Twrci yn ergyd arall i obeithion Cymru o gyrraedd Euro 2024 drwy'i grŵp rhagbrofol.

Ac er fod dal posibilrwydd o gyrraedd y gemau ail gyfle diolch i Gynghrair y Cenhedloedd, cynyddu mae'r pwysau ar y rheolwr Rob Page.

Ar ôl ennill dim ond un o'u 12 gêm ddiwethaf ym mhob cystadleuaeth, mae Cymru'n bedwerydd yn eu grŵp - pum pwynt y tu ôl i Twrci gyda phedair gêm ar ôl i'w chwarae.

Ond yn siarad ar raglen Ar y Marc fore Sadwrn, dywedodd Owain Tudur Jones ei fod yn disgwyl i Page - a arwyddodd gytundeb bedair blynedd ym Medi y llynedd - i barhau wrth y llyw.

"Oes mae na bwysau, fydd o [Rob Page] yn ei deimlo fo," meddai.

"Mae o dan bwysau, mae o angen i rhywbeth newid.

"Dwi ddim yn meddwl fydd Cymru'n rhoi y sac iddo, dwi'n meddwl mai fo fydd wrth y llyw fis Medi."

Roedd colli o 4-2 yn erbyn Armenia yn ganlyniad hynod o siomedig

Gad gydnabod fod y gost o'i ddiswyddo "o bosib yn ffactor", fe ychwanegodd: "Rob Page oedd y rheolwr aeth a ni i Gwpan y Byd, allwn ni ddim anghofio hynny.

"Rŵan mae'r cyfnod yn mynd i ddod lle mae'n rhaid symud ymlaen o bosib, ond dal i fod i fi...mae o'n haeddu'r ymgyrch yma i drio gwneud yn iawn am y dechrau gwael yma.

"Dwi'n meddwl fydd o dal yna ar gyfer gweddill y gemau... mae'n dal yn bosib i orffen yn ail, ond yn anhebygol iawn, a jyst gobeithio bod ni'n gallu mynd drwy'r drws cefn, yr insurance policy o'r gemau ail gyfle."

Colled Joe Allen

Wedi ennill 74 o gapiau dros ei wlad, a bellach yn 33 oed, fe gyhoeddodd Joe Allen ei fod yn ymddeol o'r tîm cenedlaethol fis Chwefror.

Ond barn Owain Tudur Jones, a chwaraeodd gyda Allen dros Abertawe a Chymru, yw dylai Page geisio newid ei feddwl mewn ymdrech i drawsnewid rhediad wael y tîm.

Mae Owain Tudur Jones (chwith) yn dweud dylai Page ystyried denu Joe Allen (dde) yn ôl i'r tîm

"Mae pawb, ella, yn sbïo ar dymor diwetha' Joe, oedd yn dymor siomedig a doedd o ddim yn ffit," meddai.

"Wnaeth o bob dim posib i gyrraedd Cwpan y Byd pan doedd o dim yn ffit, a wnaeth hynny effeithio ar weddill ei dymor.

"Os mae o'n holliach mae o'n cerdded mewn i 11 cychwynnol Cymru, does ddim cwestiwn am hynny yn fy marn i, ti'n gweld y golled yn ganol cae.

"Dwi'm yn dweud fysan ni wedi cael chwe pwynt o'r ddwy gêm ddiwetha', ond dwi'n addo fysa gêm Armenia wedi bod yn wahanol hefo fo yn y tîm.

"Os mae o'n cael pre season da ac yn dechrau'r tymor nesaf yn dda, c'mon, mae o'n no brainer yn fy marn i.

"Mae'n anodd troi'r alwad i lawr, dwi'n meddwl fod Cymru ei angen o."