Pont arall dros y Fenai yn cael ei hystyried eto, medd Ken Skates

Cafodd y cynllun i adeiladu trydedd bont dros y Fenai ei ganslo yn 2023

Mae'r ysgrifennydd trafnidiaeth newydd yn dweud y bydd Llywodraeth Cymru yn adeiladu ffyrdd newydd.

Dywedodd Ken Skates wrth BBC Cymru ei bod hi'n bosib y bydd cynlluniau am drydedd bont dros y Fenai a 'llwybr coch' ar yr A494 yn Sir y Fflint yn cael eu trafod eto.

Cafodd pob prosiect mawr i adeiladu ffyrdd newydd yng Nghymru eu canslo yn 2023, am resymau amgylcheddol ac ariannol.

Ond dywedodd Mr Skates, sy'n olynu Vaughan Gething fel ysgrifennydd trafnidiaeth, ei bod hi'n annhebygol y bydd ffordd liniaru'r M4 yng Nghasnewydd yn digwydd, oherwydd costau.

'Angen i Gymru fod ar flaen y gad'

Wrth siarad ar raglen Sunday Supplement Radio Wales, dywedodd bod y cyfle i adeiladu'r ffordd honno "wedi pasio."

Dywedodd: "Mae'n rhaid i ni sicrhau bod unrhyw gynlluniau yn ystyried y realiti rydyn ni'n wynebu o ran argyfwng hinsawdd.

"Rydw i eisiau i Gymru fod ar flaen y gad wrth ddylunio ac adeiladu prosiectau newydd.

Roedd trafodaethau i adeiladu ffordd liniaru'r M4 i ddelio â thraffig yn ardal Casnewydd

Cafodd holl brosiectau mawr i adeiladu ffyrdd newydd eu canslo ym mis Chwefror 2023 oherwydd pryderon amgylcheddol, gan gynnwys trydedd bont dros y Fenai a 'llwybr coch' dadleuol ar yr A494 yn Sir y Fflint.

Yn y cynlluniau gwreiddiol, byddai'r 'llwybr coch' yn mynd o Laneurgain hyd at y ffin â Lloegr.

Dywedodd Mr Skates: "Dydyn ni heb roi'r gorau i adeiladu ffyrdd, ond mae'n rhaid i ni ddelio gyda'r amodau sy'n gysylltiedig ag adeiladu ffyrdd newydd sy'n dweud nad ydyn ni'n gallu eu hadeiladu nhw, os yw hynny'n golygu y bydd rhagor o gerbydau ar y ffyrdd.

• Canslo pob prosiect mawr i adeiladu ffyrdd newydd

• Pont y Borth i ailagor ar ôl gwaith trwsio

• Trydedd Pont Menai? Mae lôn yno’n barod!

"Mae hynny wedi achosi anhawster wrth ystyried prosiectau."

Dywedodd y byddai'n rhaid i ffyrdd newydd fod yn "well" na'r rhai sydd wedi eu hadeiladu yn y gorffennol a bod yn rhaid sicrhau bod yr arian ar gael.

Mae'r ysgrifennydd trafnidiaeth newydd, Ken Skates, eisiau i Gymru fod"ar flaen y gad wrth ddylunio ac adeiladu prosiectau newydd"

Yn 2019, fe ddaeth cynlluniau i adeiladu ffordd liniaru'r M4 yng Nghasnewydd i ben oherwydd y gost a'r effaith ar yr amgylchedd.

Dywedodd Mr Skates bod y cyfle i ail edrych ar y cynlluniau hynny "wedi pasio".

"Allai ddim gweld hynny'n digwydd. Byddai'r gost yn enfawr."

"O ystyried y sefyllfa economaidd presennol, byddai'r cynllun yn costio mwy o lawer na'r hyn gafodd ei awgrymu ar y pryd, ac allai ddim gweld y bydd yr arian ar gael."

Ond, dywedodd Mr Skates y byddai'n "barod iawn" i drafod sut i ariannu prosiectau posib gyda Llywodraeth y DU.

Dywedodd Ysgrifennydd Cymru, David TC Davies, bod sylwadau Ken Skates yn "addawol"

Wrth ymateb, fe ddywedodd Ysgrifennydd Cymru, David TC Davies, bod yr hyn mae Mr Skates yn ei ddweud yn "addawol".

"Dydw i ddim yn siŵr os yw penderfyniad llywodraeth Cymru i roi'r gorau i'r cynllun i adeiladu ffordd liniaru'r M4 ar sail egwyddor, neu ar sail y gost.

"Os mai'r gost ydi'r rheswm yna mae'n sicr yn werth cael trafodaeth."