Cymru Football: 'Pêl-droed llawr gwlad wedi elwa' o lwyddiant ap

Mae'r ap Cymru Football wedi ei lawrlwytho 285,627 o weithiau ers ei lansiad ym Medi 2020

Mae llwyddiant ap newydd wedi cynyddu diddordeb ym mhêl-droed llawr gwlad a gwneud bywyd yn haws i'r gwirfoddolwyr sy'n gweinyddu'r gêm.

Dyna farn rhai o'r trefnwyr wedi ymdrech i drawsnewid llawer o'r gwaith papur i fod yn ddigidol.

Wedi ei lansio yn 2020, mae'r ap Cymru Football yn cymryd y data sy'n cael ei gofnodi gan glybiau, dyfarnwyr a rheolwyr ac yn ei wneud ar gael i'r cyhoedd.

Oherwydd hyn, am y tro cyntaf erioed, mae modd i gefnogwyr ddilyn gemau o bob cwr o'r byd.

Wrth i Gymdeithas Bêl-Droed Cymru (CBDC) weithio ar ddatblygiadau pellach, gan gynnwys fersiwn Cymraeg, mae rhai o wirfoddolwyr y clybiau wedi croesawu'r meddalwedd newydd.

• Chwarter dyfarnwyr pêl-droed Cymru wedi'u cam-drin

• Rheolau 'caeth' yn 'lladd clybiau pêl-droed llai'

• Pêl-droed cerdded: Timau o ledled y byd yng Nghymru

• Diffyg Cymraeg ym mhêl-droed lleol yn 'rhwystredig'

• LaLiga i noddi crysau Clwb Pêl-droed Llanfairpwll

Dywedodd Daniel Jose o'r tîm sydd wedi datblygu'r ap o fewn CBDC, fod dyfodiad y meddalwedd wedi lleihau'r baich ar wirfoddolwyr oedd yn arfer gorfod gwneud y gwaith gweinyddol i gyd ar bapur a drwy'r post.

Datblygu'r system gyfrifiadurol 'Comet', meddai, wnaeth alluogi gwneud yr holl ddata ar gael i'r cyhoedd.

Mae'r ap wedi ei lawrlwytho 285,627 o weithiau ers ei lansiad ym Medi 2020.

"Sbardun mawr y system Comet oedd ceisio gwneud pethau'n haws i wirfoddolwyr," meddai Daniel Jose wrth Cymru Fyw.

"Cyn Comet roedd popeth yn llafurus iawn, y pethau fel talu am gofrestriadau neu wneud cofrestriadau.

"Yn aml roedd yn rhaid i chi yrru i dŷ'r ysgrifennydd i gofrestru, postio'ch arian drwy'r post neu beth bynnag. Y syniad oedd i wneud hyn i gyd yn ddigidol lle bo'n bosibl, a cheisio gwneud pethau ychydig yn haws i wirfoddolwyr.

"Ond gyda'r holl wybodaeth mewn un lle roeddech yn gallu ei droi fewn i rywbeth cadarnhaol, fel yr ap."

'Mae'n lot haws'

Yn ôl ysgrifennydd un clwb ym Môn, mae wedi gwneud bywyd yn haws i wirfoddolwyr ond mae hefyd yn ffordd i gefnogwyr gadw cysylltiad gyda'u clybiau lleol.

"Mae o wedi gwneud gwahaniaeth mawr," meddai Graham Cohen o CPD Tref Llangefni wrth Cymru Fyw.

Yn ôl ysgrifennydd CPD Llangefni, Graham Cohen, mae diddordeb "yn bendant yn cynyddu" ers dyfodiad yr ap

"Pethau fel arwyddo chwaraewyr, mae o lot haws a dydi - rhywun ddim yn gorfod delio hefo papur a mynd i dŷ pobl yn nocio ar y drws a gofyn iddyn nhw arwyddo. Mae o i gyd yn medru cael ei wneud ar-lein, sy'n lot haws.

"Mae'r admin ar ddiwrnod y gêm lot haws hefyd. Yn y dyddiau cynt roedd rhaid ffonio'r sgôr i fewn ar ddiwrnod y gêm a dweud dros y ffôn pwy oedd wedi sgorio, cael cardiau melyn a coch.

"Rŵan 'dan ni'n mynd ar y ffôn a bwydo'r wybodaeth yna yn fyw ac ar y pryd, ac mae'n lleihau'r gwaith gweinyddol.

"Mae'n neud o'n haws i wneud y gwaith achos fod gymaint o dimau yn y clwb - timau merched, reserves a plant."

Mae'r clwb hefyd wedi sylwi'r effaith ar gefnogwyr, gyda chyfeillion i'r clwb o bedwar ban byd hefyd yn gallu cadw i fyny erbyn hyn.

"Mae pawb [ar ochr y cae] fel bod nhw'n cadw llygad ar be sy'n mynd ymlaen a be mae'r rivals a thimau lleol eraill yn ei wneud. Achos fod o'n fyw fe glywi di bobl yn cynhyrfu weithiau os oes na gôl mewn gêm arall.

"Mae o bendant yn cynyddu diddordeb. Rŵan ti'm yn gorfod bod yn lleol i ddilyn tîm. Maen nhw'n medru accessio o'r ap a cadw llygad... gynon ni gwpl o bobl yn cadw llygad ar be 'dan ni'n neud yn Canada.

"Maen nhw hyd yn oed yn ebostio fi weithiau yn llongyfarch ni. Mae o bendant yn ffordd well o engagio hefo cefnogwyr sydd ddim yn byw yn lleol. Mae'r interest bendant yn cynyddu."

'Hyrwyddo gêm y merched'

Un arall sydd wedi gweld budd o'r dechnoleg newydd ydy Llio Emyr, sy'n aelod o Glwb Pêl-droed y Felinheli.

Mae hi'n chwarae i'r tîm merched ac yn hyfforddi ieuenctid y clwb.

Llio Emyr: "Fel defnyddiwr o'r ap fy hun dwi'n licio sbio ar ganlyniadau cynghreiriau gwahanol, dynion a merched"

"Mae symud pethau i fod yn ddigidol wedi gwneud gymaint o wahaniaeth i ni fel clwb," meddai.

"'Dwi'n cofio bod ar ochr y lein yn hyfforddi y tîm dan 16 a 14 a bod hefo darn o bapur hefo enwau pawb a trio sortio'r tîm a'r reffarî ac yn y blaen, ac os ydy'n bwrw glaw a chwythu, papurau'n mynd i bob man... dio'm yn practical rîli.

"Mae'r ap yn ffantastig ni i fel clwb ac yn gyfle da i ni gadw trac ar bob dim.

"Fel defnyddiwr o'r ap fy hun dwi'n licio sbio ar ganlyniadau cynghreiriau gwahanol, dynion a merched... Mae'n gyfle da i hyrwyddo pêl-droed ar bob lefel ac i gefnogwyr gael cymryd rhan ac teimlo'n fwy yn rhan o'r peth.

"Hefyd yn sicr i gêm y merched mae o ond am helpu hyrwyddo'r ffaith fod na gynghreiriau cystadleuol iawn."

'Eisiau cyflwyno'r Gymraeg'

Yn ôl CBDC mae 285,627 wedi defnyddio'r ap ers ei gyflwyno, gyda 162,910 eisoes wedi ei defnyddio y tymor yma.

Ond o safbwynt diogelu mae manylion unrhyw chwaraewr o dan 16 oed wedi eu cuddio fel rhagosodiad.

Mae'r newidiadau'n effeithio ar bob lefel o'r gêm

Ychwanegodd Daniel Jose: "Rwy'n ymwneud â chlwb fy hun, a cyn gynted ag y mae'r chwiban olaf wedi mynd mae chwaraewyr a chefnogwyr yn estyn am yr ap i weld sut mae'r timau eraill wedi dod ymlaen.

"Mae'n denu cynulleidfa newydd a lefel newydd o ymgysylltu a 'dan ni'n gobeithio tyfu'r gêm yng Nghymru.

"Mae'r iaith Gymraeg yn rywbeth 'da ni isho'i gyflwyno i'r ap ac i system Comet.

"Mae tua 39,000 o eiriau a thermau gwahanol angen eu cyfieithu. Mae'n fater o roi hynny ar waith a chael y logisteg yn ei le i wneud i hynny ddigwydd.

"Mae ein diolch yn fawr i'r gwirfoddolwyr, clybiau, chwaraewyr, teuluoedd ac ati sydd i gyd wedi dechrau defnyddio hwn a'i wneud yn gymaint o lwyddiant.

"Byddai'r holl beth wedi disgyn ar y cam cyntaf os na fyddai pobl wedi prynu fewn iddo felly mae'r llwyddiant yn dyst i bawb ym mhêl-droed Cymru."