'Andros o sioc' wedi i ddynion ymosod ar ddyn a dwyn ei gar

Roedd Alan Chappell-Williams yn cerdded adref o ganol Caerdydd y llynedd ar ôl bod allan am noson gyda ffrind pan wnaeth rhywun ymosod arno.

Cafodd ei ffôn symudol, ei waled a'i oriadau eu dwyn ac ar ôl treulio'r noson yn yr ysbyty fe ddaeth adref. O fewn munudau i hynny roedd ei gar wedi ei ddwyn.

Roedd ei gerbyd ymysg dros 4,000 a gafodd eu dwyn yng Nghymru yn y flwyddyn hyd at fis Mawrth 2024 – cynnydd o 31% mewn deng mlynedd, yn ôl ffigyrau'r Swyddfa Gartref.

Dywedodd Llywodraeth y Deyrnas Unedig eu bod yn benderfynol o leihau'r nifer o gerbydau sy'n cael eu dwyn.

Ym mis Mai 2024, cafodd Mr Williams ei guro yn anymwybodol gan ddau ddyn yn ardal Glan-yr-afon o'r ddinas.

"Roedd o yn andros o sioc," meddai. "Ti ddim yn clywed am bethau fel hyn yn digwydd yng Nghaerdydd yn aml."

Fe dorrodd ei ysgwydd, ei drwyn ac roedd ganddo lygaid du.

Dydi o ddim yn cofio'r ymosodiad yn digwydd a phan ddeffrodd fe sylweddolodd ei fod yn yn Ysbyty Athrofaol Caerdydd.

Tua 07:30 y bore canlynol fe gyrhaeddodd adref a rai munudau yn ddiweddarach roedd ei gar wedi ei ddwyn gan yr ymosodwyr.