Blwyddyn o golli a chreu swyddi yng Nghymru

Agorodd Ford ffatri ym Mhen-y-bont yn 1980 ond bydd yn cau mewn llai na blwyddyn

Roedd yna sawl ergyd i economi Cymru yn ystod 2019 - ac eto sawl cyhoeddiad mwy calonogol wrth edrych ymlaen at y 12 mis nesaf.

Er gwaethaf gostyngiad yn lefelau cyflogaeth eleni, mae cyfradd y bobl mewn gwaith yn parhau'n uchel.

Dyma rai o ddatblygiadau mwyaf arwyddocaol y 12 mis diwethaf.

Busnesau a ffatrïoedd sydd wedi neu ar fin cau

Bydd 1,700 o swyddi'n diflannu pan fydd cwmni Ford yn cau ei ffatri ym Mhen-y-bont ym Medi 2020.

Mynnodd y cwmni mai newid yn y galw gan gwsmeriaid a chostau anfanteisiol oedd yn gyfrifol am y penderfyniad, nid Brexit.

Ym mis Hydref, cyhoeddodd cwmni Hilex fwriad i gau ei safle ym Maglan yn 2021, gan dorri tua 125 o swyddi a symud gwaith i Hwngari.

Mae'r cwmni'n cynhyrchu cydrannau drws a ffenestr a cheblau ar gyfer cerbydau i gynhyrchwyr ceir fel Honda, Audi a BMW.

Roedd Schaeffler wedi cyflogi pobl yn Llanelli ers 1957 cyn cau eleni

Un lle sydd eisoes wedi cau yw ffatri geir Schaeffler yn Llanelli, oedd yn cyflogi 220 o weithwyr.

Dywed y cwmni bod "mwyafrif" y staff oedd yn dymuno parhau yn y diwydiant wedi cael gwaith gyda chyflogwyr eraill.

Ym mis Ebrill, daeth cwymp y cwmni adeiladu Dawnus, oedd â phencadlys yn Abertawe a dyledion o £50m.

Yn ôl y gweinyddwyr, Grant Thornton, mae'n "annhebygol iawn" y bydd nifer o'r credydwyr yn cael eu had-dalu.

Mae Llywodraeth Cymru'n gobeithio hawlio rhywfaint o'u harian yn ôl ar ôl rhoi benthyciad gwarantedig o £1.5m.

Roedd tua 700 yn gweithio i'r cwmni neu i is-gontractwyr.

Bu'n rhaid gadael gwaith ar ei hanner yn ardal Kingsway Abertawe ym mis Mawrth pan aeth cwmni Dawnus i drafferthion

Aeth y cwmni dodrefn Triumph i'r wal ym mis Hydref wedi "cwymp trychinebus mewn archebion" a arweiniodd at golli 252 o swyddi.

Roedd y cwmni teuluol â safleoedd ym Merthyr Tudful a Dowlais, a dywedodd y prif weithredwr eu bod "yn bryderus iawn am les yr holl weithwyr a'u teuluoedd".

Roedd yna fygythiad i 50 o swyddi ym Mhort Talbot ym mis Mehefin pan aeth y cwmni adeiladu Jistcourt i ddwylo'r gweinyddwyr,

Parhau mae ansicrwydd ynghylch dyfodol 380 o swyddi gwaith dur trydanol Orb yng Nghasnewydd wedi i gwmni Tata ddod â'r gwaith cynhyrchu i ben a cheisio sicrhau prynwr newydd.

Mae Ineos yn rhagweld y bydd ffatri newydd ym Mhen-y-bont yn cyflogi 500 o bobl ac yn cynhyrchu 25,000 o geir bob blwyddyn

Datblygiadau mwy calonogol

Ym mis Medi, cyhoeddodd Ineos mai ym Mhen-y-bont y bydd eu cerbyd 4x4 newydd yn cael ei gynhyrchu o 2021 ymlaen.

Mae disgwyl y bydd tua 200 yn cael eu cyflogi yn y lle cyntaf, gyda'r nifer yn codi i 500 yn y tymor hir.

Mae'r cwmni wedi cael cefnogaeth ariannol gan Lywodraeth Cymru a Llywodraeth y DU fel rhan o gystadleuaeth i ddatblygu technolegau newydd.

Mae OXIS Energy â phresenoldeb eisoes yn Belo Horizonte, ym Mrasil ond mae hefyd yn gobeithio cyflogi cannoedd o weithwyr ym Mhort Talbot o fewn degawd

Ym Mehefin, cyhoeddodd y cynhyrchydd batris aildrydanadwy OXIS Energy fwriad i godi ffatri ym Mhort Talbot a chreu cannoedd o swyddi o fewn y 10 mlynedd nesaf.

Bydd y safle'n cynhyrchu cydrannau batris ar gyfer bysiau, tryciau, dronau a llongau tanfor, fydd yn cael eu hallforio i safle ym Mrasil ar gyfer cwblhau'r broses gynhyrchu.

Cymro, Huw Hampson-Jones, yw perchennog y cwmni, sydd wedi derbyn buddsoddiad o £3.2m gan Fanc Datblygu Cymru ac sy'n gobeithio cyflogi 50 ym Mhort Talbot cyn diwedd 2020.

Model DBX Aston Martin yw'r car cyntaf i gael ei gynhyrchu yng Nghymru

Wedi gwaith uwchraddio a ddechreuodd yn 2017, agorodd Aston Martin ei ffatri yn Sain Tathan yn swyddogol a lansio'n car cyntaf i gael ei gynhyrchu yng Nghymru - y DBX.

Eisoes mae 300 o staff yno ond bydd hynny'n codi i 750 yn y pen draw.

Mae'n fwriad i ganoli gwaith cynhyrchu ceir trydanol y cwmni yn Sain Tathan, er bydd y cerbydau Lagonda a RapidE newydd yn cael eu cynhyrchu ar raddfa lai o lawer.

Ym mis Ionawr, cyhoeddodd banc digidol o Lundain, Monzo ei fod am greu dros 300 o swyddi yng Nghaerdydd dros bedair blynedd.

Cafodd y cwmni £950,000 o gyllid gan Lywodraeth Cymru er mwyn agor canolfan gweithrediadau cwsmer newydd.