Chwaraeon Cymru: Pump i'w gwylio yn 2022

Yn draddodiadol, ar ddydd Gŵyl San Steffan, fe fyddai yna lawer o gemau ar y meysydd chwarae ond eleni mae chwaraeon yr ŵyl wedi'u llethu gan Covid.

Ond mae Cymru Fyw wedi herio Gohebydd Chwaraeon BBC Cymru, Owain Llŷr, i ddewis pum person ifanc ym myd y campau i'w gwylio yn 2022. Beth ydych chi'n ei feddwl o'i ddewisiadau?

Christ Tshiunza - 19 oed

Mae Ysgol Uwchradd yr Eglwys Newydd wedi helpu i feithrin talentau Sam Warburton, Gareth Bale a Geraint Thomas dros y blynyddoedd.

Tybed a'i Christ Tshuinza fydd y cyn-ddisgybl nesaf i wneud ei farc ar y byd chwaraeon?

Yn gymwys i chwarae dros Ffrainc a Lloegr hefyd, mae o wedi dewis chwarae dros Gymru, ac mae o'n barod wedi ennill dau gap yn ystod Cyfres yr Hydref eleni.

Yn chwe throedfedd a chwe modfedd, mae'r gallu ganddo i chwarae yn yr ail-reng ac yn y rheng-ôl, ac mae disgwyl iddo fod yn aelod blaenllaw o'r garfan ryngwladol am flynyddoedd i ddod.

Carrie Jones - 18 oed

Mae 2021 wedi bod yn flwyddyn o newid i dîm pêl-droed merched Cymru, gyda Gemma Grainger yn cymryd drosodd gan Jayne Ludlow fel rheolwr.

Yn amlwg mae gan Grainger feddwl mawr o Carrie Jones, achos mae hi wedi chwarae rhan amlwg ystod ymgyrch ragbrofol Cwpan y Byd 2023.

Ar ôl ymuno ag academi Manchester United yn 2020, mae hi bellach yn aelod rheolaidd o garfan y tîm cyntaf, gan arwyddo ei chytundeb proffesiynol cyntaf gyda'r clwb ychydig fisoedd yn ôl.

Mae gen i deimlad y bydd Jones yn serennu ar lefel clwb ac ar y lefel rhyngwladol am flynyddoedd maith i ddod.

Matthew Richards - 18 oed

Am flwyddyn oedd 2021 i Matthew Richards.

Mi oedd o'n rhan o dîm Prydain enillodd y ras gyfnewid 4x200m dull rhydd yn y Gemau Olympaidd yn Tokyo.

Richards a Calum Jarvis (oedd hefyd yn rhan o'r tîm) ydy'r nofwyr cyntaf o Gymru i ennill medal aur yn y Gemau ers 1912.

Mae o hefyd yn nofiwr unigol gwych hefyd, yn ennill y ras 100m dull rhydd ym Mhencampwriaethau Ieuenctid Ewrop yn 2019.

Y gobaith ydy y gwelwn ni Richards yn cynrychioli Cymru yn y pwll yng Ngemau'r Gymanwlad 2022 yn Birmingham.

Isaak Davies - 20 oed

Mae system ieuenctid clwb pêl-droed Caerdydd yn gweithio'n dda ar y funud.

'Dan ni'n barod wedi gweld Rubin Colwill a Mark Harris yn chwarae dros Gymru ar ôl torri mewn i dîm cyntaf Caerdydd.

Dwi'n eithaf siŵr mai Isaak Davies fydd y chwaraewr nesaf o academi yr Adar Gleision i gael ei alw mewn i'r garfan ryngwladol.

Mae o'n gwisgo rhif 39, sef hen rif Craig Bellamy. Mae Davies hefyd yn chwaraewr tebyg iawn i Bellamy - cyflym ac yn llawn triciau.

Mae o wedi creu argraff fawr tra'n chwarae i Gaerdydd yn ddiweddar, gan fwyaf fel eilydd. Dwi'n siŵr y bydd o'n dechrau gemau yn rheolaidd erbyn diwedd y tymor.

Zoe Backstedt - 17 oed

Mae'r ferch yma'n barod wedi cyflawni cymaint yn ei gyrfa.

Ar lefel ieuenctid mae hi wedi ennill Pencampwriaeth Ras Ffordd y Byd, ac mae hi wedi ennill Pencampwriaeth Trac Ewrop ar dri achlysur.

Ond yn fwy diweddar fe enillodd ei ras broffesiynol gyntaf draw yng Ngwlad Belg, sy'n golygu fod pawb yn y byd beicio wedi dechrau cymryd sylw ohoni.

Dydi hi ddim syndod ei bod hi'n mor dalentog ar gefn beic - mae ei thad Magnus wedi ennill cymal yn y Tour de France, tra bod ei mam Megan wedi cystadlu dros Gymru yng Ngemau'r Gymanwlad.

Mae beicio felly'n rhedeg yn y gwaed yn y teulu!