Digwyddiadur 2022: mae'r tymor gwyliau yn ôl
- Cyhoeddwyd
Er gwaetha' gwyliau ar-lein difyr ac arloesol dros y ddwy flynedd ddiwethaf, tydi digwyddiadau digidol ddim yn yr un cae a mynd i ŵyl go iawn.
A gyda chyfyngiadau Covid wedi llacio a'r gaeaf wedi'n gadael, mae'r calendr yn dechrau llenwi wrth i wyliau gael eu cadarnhau ledled Cymru.
Felly, dyma restr o rai o hoff wyliau Cymru fydd yn digwydd eleni - nifer am y tro cyntaf ers 2019.
Gŵyl Gomedi Machynlleth
Rhod Gilbert yn cyflwyno i Radio Wales o'r ŵyl yn 2019
Gyda phopeth sy'n digwydd yn y byd ar hyn o bryd mae wir angen dos o chwerthin, a bydd digon o hynny dros benwythnos gŵyl Fai ym Mhowys.
Tudur Owen, Elis James, Rosie Jones, James Acaster, Kiri Pritchard-McLean, Angela Barnes - dim ond rhai o'r 200 o gomediwyr fydd yn perfformio ym Machynlleth rhwng 29 Ebrill a 1 Mai.
FOCUS Wales
Afro Cluster, y band ffync/hip hop o Gaerdydd yn perfformio llynedd yn Focus Wales
Dyma 11feg blwyddyn yr ŵyl sy'n rhoi llwyfan i rai o dalentau newydd y byd cerddoriaeth yng Nghymru ac artistiaid rhyngwladol.
Rhwng 5-7 Mai bydd 20 lleoliad yn Wrecsam yn rhoi llwyfan i 250 o artistiaid yn cynnwys Bandicoot, Echo and the Bunnymen, Self Esteem a Public Service Broadcasting.
Gŵyl Fel 'Na Mai
Gŵyl newydd oedd am gael ei chynnal yn 2020, gafodd ei gohirio oherwydd Covid ond sy'n gallu estyn croeso o'r diwedd ar 7 Mai eleni.
Gŵyl gerddoriaeth wedi ei threfnu gan y gymuned yn ardal Crymych ydi hon, a bydd artistiaid fel Dafydd Iwan, Bwncath, Los Blancos a Mei Gwynedd a'r band yn diddanu'r dorf yn Sied Fawr Trafnidiaeth y Frenni, Parc Gwynfryn, Crymych.
Gŵyl Fwyd Caernarfon
Dau stondinwr yn arddangos eu cynnyrch bwyd môr yng ngŵyl fwyd Caernarfon 2019
Mewn cyfnod byr, mae gŵyl fwyd Caernarfon wedi ennill ei phlwy fel un o brif ddigwyddiadau'r gogledd orllewin.
Dydy'r ŵyl, sy'n dod a stondinau, arddangosiadau coginio, gweithgareddau i'r teulu a cherddoriaeth i'r dref hynafol, heb ei chynnal ers 2019 ond bydd yn ei hôl eleni ar 14 Mai.
Gŵyl y Gelli
Mae un o brif wyliau llenyddol a chelfyddydol Prydain yn ôl yn 'nhref y llyfr' y Gelli Gandryll, Powys, ar ôl bod ar-lein ers 2019.
Ymysg y 500 o westeion rhwng 26 Mai a 5 Mehefin, fydd Prif Weinidog Yr Alban, Nicola Sturgeon, y newyddiadurwr Lyse Doucet a'r actor Benedict Cumberbatch.
Eisteddfod yr Urdd
Cofio hyn? Hwyl gyda swigod yn yr Eisteddfod yr Urdd olaf cyn Covid, ym Mae Caerdydd 2019
Ydi, am y tro cyntaf ers tair blynedd mae Eisteddfod Genedlaethol yr Urdd yn ei hôl... a gwell byth mae mynediad am ddim drwy'r wythnos.
Bydd rhai newidiadau eleni yn Ninbych, a bydd 'Gŵyl Triban' yn cael ei chynnal i ddathlu canmlwyddiant y mudiad.
Felly ewch draw i Ddinbych rhwng 30 Mai a dydd Sadwrn 4 Mehefin.
Tafwyl
Yn ogystal â chynulleidfa fyw o dan amodau penodol, roedd cynulleidfa yn gwylio ar blatfform digidol AM yn Tafwyl 2021
Fe wnaeth gŵyl gelfyddydol Gymraeg Caerdydd ddenu 40,000 nôl yn 2019, ac mae hen edrych ymlaen eleni ar ôl gŵyl ddigidol 2020 a gŵyl gyfyngedig 2021.
Bydd Sŵnami, Yws Gwynedd, Adwaith a Breichiau Hir ymysg yr artistiaid fydd yn perfformio yng Nghastell Caerdydd ar 18-19 Mehefin.
Am wythnos cyn y brif ŵyl bydd nifer o ddigwyddiadau ffrinj yn cael eu cynnal mewn lleoliadau ar draws y ddinas, ac mae'r ŵyl unwaith eto eleni yn rhad ac am ddim.
Gŵyl Arall
Mwynhau o fewn muriau castell Edward y cyntaf yn 2018
Sgyrsiau, cerddoriaeth, teithiau, celf - mae pob math o ddigwyddiadau yn cael eu cynnal o fewn hen furiau tref Caernarfon yng Ngŵyl Arall.
Bydd gŵyl gelfyddydol eleni yn cael ei chynnal rhwng 8-10 Gorffennaf.
Sesiwn Fawr Dolgellau
Mwynhau'r Candelas yng Nghlwb Rygbi Dolgellau yn 2019
Er gwaethaf llwyddiant eu gŵyl ar-lein, mae'n anodd cystadlu gyda'r profiad o weld cerddoriaeth byw yn Nolgellau ac ambell i sesiwn jamio anffurfiol dros beint yn rhai o dafarndai'r dref.
Felly pa well anrheg pen-blwydd 30 i'r ŵyl na'r Sesiwn Fawr yn ôl yn Nolgellau?
Yws Gwynedd, Yr Eira, Cledra, Bandicoot, Bwncath ydi rhai o'r artistiaid fydd yn perfformio rhwng 15-17 Gorffennaf.
Y Sioe Fawr
Ar ôl methu cynnal Y Sioe dros y ddwy flynedd ddiwethaf, mae'r anifeiliaid, crefftau ac adloniant yn ôl ar faes y Sioe eleni.
Felly mae disgwyl miloedd ddychwelyd i Lanweledd rhwng 18-21 Gorffennaf ar gyfer un o brif ddigwyddiadau'r calendr amaethyddol.
Yr Eisteddfod Genedlaethol
Yr Archdderwydd Myrddin ap Dafydd yn seremoni cadeirio'r Prifardd T James Jones
Tregaron 2020 oedd hi fod, wedyn Tregaron 2021 - a rŵan Tregaron 2022.
Mae tocynnau Maes B wedi bod ar werth ers cyn y Nadolig, nifer fawr o ymholiadau am le ar y maes carafanau a'r trefnwyr yn edrych ymlaen at groesawu eisteddfodwyr i'r Maes unwaith eto.
Mae'n bosib fydd rhai pethau yn wahanol i flynyddoedd arferol wrth i'r trefnwyr addasu i ganllawiau, ond mae Sadwrn 30 Gorffennaf i Sadwrn 6 Awst yn llawn yn nyddiadur nifer fawr o Gymry yn barod.